— Ranicaj rasijskija vojski stali nanosić rakietnyja ŭdary pa Kijevie. Dźvie kryłatyja ci balistyčnyja rakiety ŭdałosia pierachapić, taksama byŭ źbity latalny aparat. Abłomki trapili ŭ žyłyja kvartały, adbylisia parušeńni i pažary. Jość paranienyja.
— Šakujučyja kadry z kijeŭskaha rajona Abałoń, dzie BMP pierajechała lehkavik. Kiroŭca vyžyŭ, ale znachodzicca ŭ ciažkim stanie. Jak vyśvietliłasia, u hetaj častcy ŭkrainskaj stalicy źjavilisia dyviersijna-raźviedvalnyja hrupy rasijan. Nieŭzabavie ŭkrainskija vajskoŭcy paviedamili, što jany byli źniščanyja.
— U cełym, jak śćviardžajuć Uzbrojenyja siły Ukrainy, situacyja z ulikam stanovišča zastajecca kantralavanaj. Na łuhanskim, danieckim, maryupalskim kirunkach rasijskija vojski ŭdałosia strymać. Na napramkach Charkava, Sumaŭ, Chiersona, Zaparožža, Mikałajeva, Čarnihava viaducca bai.
— U Biełarusi nazirajecca aktyŭnaje pieramiaščeńnie vajskovaj techniki i avijacyi. Ukrainskija vajskoŭcy śćviardžajuć, čto kiravańnie i naviadzieńnie avijacyi ažyćciaŭlajecca samalotami A-50 z terytoryi Minskaj vobłaści ŭ pavietranaj prastory Biełarusi i akupavanaha Kryma. Taksama viadoma, što na aeradromie Homiela pryziamlilisia rasijskija Ił-76 z desantnikami na borcie.
— Ukrainskaje kiraŭnictva ličyć zabojstva Uładzimira Zialenskaha hałoŭnaj metaj rasijskaha nastupleńnia. Uviečary prezident Ukrainy raźmiaściŭ videa, zroblenaje na vulicy Kijeva.
— Uładzimir Zialenski zaklikaŭ Pucina sieści za stoł pieramovaŭ, kab spynić hibiel ludziej. Mienavita pa prośbie prezidenta Ukrainy raniej prezident Francyi Emanuel Makron telefanavaŭ u Kreml, ale biespaśpiachova: «Prezident Rasii abraŭ vajnu». Paźniej da pieramovaŭ Rasiju zaklikaŭ Kitaj. Ułady RF zajavili, što hatovyja adpravić delehacyju ŭ Minsk, adnak ukrainski bok nibyta nie vychodzić na suviaź.
— Uviečary zajavu zrabiŭ Uładzimir Pucin. Pavodle prezidenta Rasii, asnoŭny supraciŭ va Ukrainie akazvaje nie rehularnaja armija, a «nacyjanalistyčnyja farmavańni»: «Bienderaŭcy i nieanacysty vystaŭlajuć ciažkaje ŭzbrajeńnie, u tym liku sistemy załpavaha ahniu, prosta ŭ centralnych rajonach bujnych haradoŭ, u tym liku Kijeva i Charkava». Jon źviarnuŭsia da vajskoŭcaŭ Uzbrojenych siłaŭ Ukrainy, zaklikaŭ ich brać uładu ŭ svaje ruki.
— Pa źviestkach Bloomberg, za pieršy dzień vajny rasijski biznes straciŭ $39 młrd. Bolš za ŭsio — prezident «ŁUKOJŁa» Vahit Alakpieraŭ, čyjo bahaćcie mienš čym za sutki skaraciłasia na $6,2 młrd, da $13 młrd.
— U niekatorych biełaruskich bankaŭ ad siońnia prablemy z kartkami. Siarod ich — «BiełVEB», «Technabank», RRB i VTB.
— Bolšaść kiraŭnikoŭ MZS krain ES vystupili za zamarozku aktyvaŭ rasijskaha prezidenta Uładzimira Pucina i ministra zamiežnych spraŭ Siarhieja Łaŭrova ŭ ramkach sankcyj z-za rasijskaha ŭvarvańnia va Ukrainu.
— Adbyłasia reakcyja ŭ kulturnaj i spartyŭnaj śfierach. Rasiju pazbavili prava ŭdziełu ŭ «Jeŭrabačańni». RF zastałasia bieź finału futbolnaj Lihi čempijonaŭ, što maje prajści 28 maja. Etap «Formuły-1», jaki prachodzić u Sočy, admienieny. Mižnarodny alimpijski kamitet zaklikaŭ pieranieści ŭsie mižnarodnyja spabornictvy z terytoryi Rasii i Biełarusi. A taksama nie vyviešvać rasijskija i biełaruskija ściahi na turnirach.
— Čechija i Polšča začyniajuć pavietranuju prastoru dla rasijskich avijakampanij. Raniej «Aerafłot» trapiŭ pad brytanskija sankcyi.
— U MZS Vialikabrytanii byŭ vyklikany ambasadar Biełarusi. Namieśnik ministra Džejms Klevierli daŭ zrazumieć dypłamatu, što sankcyi taksama buduć raspaŭsiudžvacca na tych biełaruskich fizičnych i jurydyčnych asob, jakija sadziejničali i padtrymlivali ahresiju va Ukrainie.
— Pravaabaroncam stała viadoma pra niekalki zatrymańniaŭ za kamientaryi, u jakich asudžalisia dziejańni Rasii. Siarod tych, da kaho pryjšoŭ HUBAZiK — Pavieł Łaryn. «Pakajannaje videa» źjaviłasia na adnym z praŭładnych Telegram-kanałaŭ.
