AAN
Hienieralny sakratar AAN Antoniu Huteryš nazvaŭ abviaščeńnie Pucinym vajny Ukrainie «samym sumnym momantam u pracy». Členy Rady Biaśpieki AAN asudzili rasijskaha lidara za «niespravakavanyja i nieapraŭdanyja» dziejańni.
«Heta samy sumny momant u maim znachodžańni na pasadzie hienieralnaha sakratara Arhanizacyi Abjadnanych Nacyj. Ja pačaŭ hetaje pasiadžeńnie Rady biaśpieki, źviartajučysia da prezidenta Pucina i kažučy jamu ad usiaho serca: spynicie nastup vašych vojskaŭ na Ukrainu, dajcie šaniec miru, tamu što zanadta šmat ludziej zahinuła», — skazaŭ Huteryš žurnalistam u štab-kvatery AAN, kali jon vyjšaŭ z nadzvyčajnaha pasiadžeńnia Rady Biaśpieki pa Ukrainie pozna ŭviečary ŭ sieradu.
«Ja pavinien skazać, prezident Pucin: dziela čałavienaści viarnicie svaje vojski ŭ Rasiju. Dziela čałaviečnaści, nie dazvalajcie pačać u Jeŭropie toje, što moža stać najhoršaj vajnoj z pačatku stahodździa, z nastupstvami nie tolki razburalnymi dla Ukrainy, nie tolki trahičnymi dla Rasijskaj Fiederacyi, ale i dla ŭsiaho śvietu», — skazaŭ jon.
Kiraŭnik AAN zajaviŭ, što nastupstvy ataki my navat nie možam pradbačyć.
«U toj momant, kali my vychodzim z pandemii kavidu, i tamu šmatlikim krainam, jakija raźvivajucca, absalutna nieabchodna mieć prastoru dla adnaŭleńnia, što było b vielmi i vielmi składana z vysokimi cenami na naftu, sa spynieńniem ekspartu pšanicy z Ukrainy i z rostam pracentnych stavak, vyklikanych niestabilnaściu na mižnarodnych rynkach», — skazaŭ jon.
ZŠA
Śpiecyjalnuju zajavu vypuściŭ prezident Amieryki Džo Bajden.
«Siońnia ŭviečary malitvy ŭsiaho śvietu z narodam Ukrainy, jaki pakutuje ad niespravakavanaha i nieapraŭdanaha napadu rasijskich uzbrojenych sił. Prezident Pucin abraŭ naŭmysnuju vajnu, jakaja pryviadzie da katastrafičnych čałaviečych achviar i čałaviečych pakut. Tolki Rasija niasie adkaznaść za hibiel i razbureńni, jakija pryniasie hety napad, i Złučanyja Štaty, ich sajuźniki i partniory adkažuć adzinym i rašučym čynam. Śviet pryciahnie Rasiju da adkaznaści.
Siońnia viečaram ja budu sačyć za situacyjaj ź Biełaha doma i budu praciahvać atrymlivać rehularnyja abnaŭleńnia ad majoj kamandy pa nacyjanalnaj biaśpiecy. Zaŭtra ja sustrenusia z maimi kalehami pa G7 ranicaj, a zatym źviarnusia da amierykanskaha naroda, kab abviaścić ab dalejšych krokach, jakija Złučanyja Štaty, našy sajuźniki i partniory raspačnuć u dačynieńni da Rasii za hety niepatrebny akt ahresii suprać Ukrainy i hłabalnaha miru i biaśpieki.
My taksama budziem kaardynavać svaje dziejańni z našymi sajuźnikami pa NATA, kab zabiaśpiečyć rašučy, adziny adkaz, jaki praduchilić lubuju ahresiju suprać Paŭnočnaatłantyčnaha aljansu. Siońnia viečaram my z Džył molimsia za advažny i hordy narod Ukrainy», — havorycca ŭ zajavie prezidenta Złučanych Štataŭ.
Niamieččyna
Fiederalny kancler Niamieččyny Ołaf Šolc nazvaŭ dzień pačatku vajskovaj ahresii Maskvy suprać Kijeva «žachlivym dniom dla Ukrainy i zmročnym dniom dla Jeŭropy». Adpaviednuju zajavu kiraŭnik hiermanskaha ŭrada zrabiŭ u čaćvier, 24 lutaha, u Bierlinie.
Pa słovach Ołafa Šolca, havorka idzie ab «aburalnym parušeńni mižnarodnaha prava». Rasijskaja ataka była «ničym nie apraŭdanaja», ukazaŭ jon. «Rasija pavinna nieadkładna spynić hetyja vajennyja dziejańni», — zapatrabavaŭ Šolc. Pavodle jaho słoŭ, Hiermanija salidarnaja z Ukrainaj i jaje narodam.
Ministr zamiežnych spraŭ Analena Bierbak rašuča asudziła vajennyja dziejańni suprać Ukrainy. «Svaim napadam na Ukrainu Rasija parušaje samyja elemientarnyja praviły mižnarodnaha paradku. Mižnarodnaja supolnaść nie zabudzie pra hety dzień hańby Rasii», — zajaviła kiraŭnica niamieckaha źniešniepalityčnaha viedamstva.
Krainy Bałtyi
Kiraŭniki MZS krain Bałtyi rezka asudžajuć dziejańni Rasii va Ukrainie i zaklikajuć da žorstkich sankcyj suprać ahresara, u tym liku da adklučeńnia ad sistemy SWIFT.
«My, ministry zamiežnych spraŭ Estonii, Łatvii i Litvy, rašuča asudžajem šyrokamaštabnuju ahresiju Rasii suprać niezaležnaj, mirnaj i demakratyčnaj Ukrainy», — havorycca ŭ zajavie. Na dumku ministraŭ, dziejańni Rasii nieprymalnyja i hruba parušajuć mižnarodnaje prava i normy, što źjaŭlajecca złačynstvam suprać ukrainskaha naroda. «My ŭsie ŭ mižnarodnaj supolnaści pavinny rašuča asudzić hetyja dziejańni i ŭvieści suprać Rasii samyja žorstkija sankcyi, uklučajučy adviazku ad SWIFT, palityčnuju izalacyju», — zajavili ministry.
Pa ich słovach, nieabchodna terminova dać Ukrainie ŭzbrajeńnie, bojeprypasy i inšuju vajennuju dapamohu, a taksama ekanamičnuju i humanitarnuju dapamohu.
Aŭstralija
Urad Aŭstralii acharaktaryzavaŭ dziejańni Rasii va Ukrainie jak «aburalnyja» i zaklikaŭ Maskvu nieadkładna vyvieści svaje vojski. «My abmiarkoŭvajem adnabakovyja varožyja dziejańni va Ukrainie. Rasija adkryta parušaje mižnarodnaje prava i Statut AAN», — zajaviŭ premjer-ministr Skot Morysan. «Rasija abrała šlach vajny», — dadaŭ jon.
Brytanija
Premjer-ministr Vialikabrytanii Borys Džonsan vykazaŭ svoj «žach pierad katastrafičnymi padziejami va Ukrainie». Jon abmierkavaŭ ź Zialenskim dalejšyja kroki, paviedamiŭ kiraŭnik Kabmina ŭ Twitter. «Prezident Pucin abraŭ šlach krovapralićcia i razbureńnia», — reziumavaŭ jon.
Izrail
Ministerstva zamiežnych spraŭ Izraila prosta adznačyła ŭ zajavie, što kanflikt ustupiŭ u «novuju i ciažkuju stadyju», i zahadała prykładna 8000 hramadzianam Izraila va Ukrainie pakinuć krainu praz naziemnyja pierachody na zachadzie krainy. Ministerstva paźbiahała navat zhadki Rasii ŭ zajavie ŭ sieradu, zajaviŭšy tolki, što «Izrail padtrymlivaje terytaryjalnuju cełasnaść i suvierenitet Ukrainy».
Italija
Premjer-ministr Italii Maryjo Drahi dałučyŭsia da asudžeńnia ŭvarvańnia Rasii va Ukrainu.
Drahi skazaŭ:
«Italjanski ŭrad asudžaje napad Rasii na Ukrainu. Heta nieapraŭdana. Italija blizkaja ŭkrainskamu narodu i orhanam ułady ŭ hety dramatyčny momant. My pracujem ź jeŭrapiejskimi sajuźnikami i sajuźnikami pa NATA, kab adreahavać nieadkładna i rašuča».
Hrecyja
Premjer-ministr Hrecyi Micatakis sklikaŭ terminovaje pasiadžeńnie Nacyjanalnaha savieta pa zamiežnych spravach i abaronie, kab abmierkavać uvarvańnie i toje, jak najlepšym čynam abaranić etničnych hrekaŭ, jakija pražyvajuć va Ukrainie.
Ispanija i Partuhalija
Ispanija i Partuhalija asudzili napad Rasii na Ukrainu, piša Sem Džons u Madrydzie.
Premjer-ministr Ispanii Pedra Sančas napisaŭ u Tvitary: «Urad Ispanii asudžaje ahresiju Rasii suprać Ukrainy i vykazvaje svaju salidarnaść z ukrainskim uradam i jaho narodam. Ja zastajusia ŭ ciesnym kantakcie z našymi partniorami i sajuźnikami ŭ Jeŭrapiejskim sajuzie i NATA, kab kaardynavać našy dziejańni ŭ adkaz».
