Dzianis Piščyk. Fota z sacsietak.
U hetym hodzie Dzianis skončyŭ Łojeŭski piedahahičny kaledž. Pa raźmierkavańni jaho nakiravali nastaŭnikam fizkultury ŭ sielskuju škołu ŭ Słucki rajon.
— Jon u nas stanoŭčy, — kažuć pra Dzianisa svajaki. — Usiudy ŭdzielničaje, hulaje ŭ futboł, u jaho kuča ŭznaharod.
U listapadzie 2021-ha, praciahvajuć surazmoŭcy, chłopca pryzvali ŭ śpiecnaz — u vajskovuju čaść 3214. Prykładna miesiac tamu maładoha čałavieka adpravili vučycca na siaržanta. Novyja viedy jon atrymlivaŭ u vajskovaj čaści 3310 (Akolica), jakaja znachodzicca niedaloka ad Minska.
— Kaliści jon źbiraŭsia pastupać u Vajskovuju akademiju, tamu, daviedaŭšysia, što budzie słužyć u śpiecnazie, uzradavaŭsia. U armii jamu padabałasia. Chacieŭ zastacca na kantrakcie. Kamandziry i sasłužyŭcy taksama adhukalisia pra jaho dobra, — apisvajuć toje, što adbyvajecca, surazmoŭcy i pierachodziać da situacyi ŭ vajskovaj čaści 3310.
— Apošni raz my ź im źviazvalisia ŭ subotu. Spravy, kazaŭ, išli niadrenna. U pačatku sakavika płanavalisia ekzamieny. Jon chacieŭ ich chutčej zdać i viarnucca ŭ svaju čaść. Tam, žartavaŭ, lepšaja spartzała.
U aŭtorak ź blizkimi źviazałasia dziaŭčyna maładoha čałavieka i paviedamiła: «Dzianis vypaŭ z akna treciaha paviercha».
— Z taho, što nam udałosia daviedacca ad tavaryšaŭ pa słužbie, Dzianis časta skardziŭsia na boli ŭ žyvacie i adprošvaŭsia ŭ tualet. 22 lutaha zaniatki ŭ jahonaj hrupie prachodzili na druhim paviersie. Jon taksama paprasiŭsia vyjści. Jaho doŭha nie było, chłopcy pajšli pahladzieć, što zdaryłasia, i pryviali jaho. Praź niejki čas jon znoŭ adprasiŭsia, — pierakazvajuć rodnyja toje, što im udałosia daviedacca. — Praź niejki čas inšyja sałdaty pačuli chłapok i ŭbačyli: Dzianis vypaŭ z akna.
Ciapier, kažuć rodnyja, małady čałaviek u reanimacyi.
— U jaho zakrytaja čerapna-mazhavaja traŭma, pierałomy tazabiedranaj kostki, hrudnaja kletka mocna paškodžanaja, — raskazvajuć surazmoŭcy. — Pavodle prahnozaŭ lekaraŭ, šancaŭ mała, ale ŭsio, što nam zastajecca, spadziavacca na lepšaje.
Paśla zdareńnia svajaki Dzianisa jeździli ŭ čaść. Tam im paviedamili: chłopiec vypaŭ «byccam by z pamiaškańnia pralni».
— U čaści skazali, što treci pavierch zvyčajna na zamku, ale ŭ toj dzień jon byŭ adčynieny. Vartavyja tam nie stajali, tamu jak usio zdaryłasia, nichto nie viedaje, — praciahvajuć surazmoŭcy. - Na paviersie jość kamiery, ale, jak rastłumačyli ŭ čaści, jany ŭžo hod nie pracujuć. U prybiralni čaści, adznačajuć blizkija, znajšli kancylarski nož u kryvi. Ale lekar rastłumačyŭ: vieny ŭ chłopca cełyja.
— Adzin z tavaryšaŭ pa słužbie skazaŭ, što heta mahło być z-za dziaŭčyny, ale my nie možam u takoje pavieryć. Dzianis čałaviek, jaki moh znajści vyjście ź luboj situacyi, — raspaviadajuć rodnyja. —
Dziaŭčyna kaža, jany nie svarylisia. Ale ŭ paniadziełak jana zaŭvažyła: hołas u jaho byŭ sumny. Kali spytałasia, što zdaryłasia, jon adkazaŭ: raskažu zaŭtra, ci sama ŭsio daviedaješsia. Pisaŭ joj, što jana ŭ jaho samaja lepšaja. Prasiŭ pieradać baćkam (ci to kazaŭ, što sam skaža), što jon ich lubić.
Pa słovach blizkich, kali zdaryłasia biada, jany stali źviazvacca ź siabram Dzianisa. Daviedvalisia, ci nie kazaŭ jon im čahości. Adzin z adnakłaśnikaŭ uspomniŭ: Dzianis cikaviŭsia, kali parezać vieny, kolki čałaviek pražyvie. Kali adnakłaśnik udakładniŭ, navošta jamu heta, małady čałaviek adkazaŭ, što paspračalisia z kaleham.
Zaraz baćki Dzianisa ŭ Minsku. U vajskovaj čaści 3214 siamju padtrymali. Mamie i tatu dali internat. Vydzielili mašynu z kiroŭcam, jaki vozić ich u balnicu i da śledčych.
— Jon maryŭ ab prafiesii vajskoŭca, byŭ usim zadavoleny. Małady, zdarovy, spartyŭny. U čaści pra jaho taksama adhukajucca stanoŭča. Načalniki i chłopcy kažuć, ničoha padazronaha nie zaŭvažali. My prosta nie razumiejem — što adbyłosia, pryčym tak chutka, — hublajucca ŭ zdahadkach blizkija.
Za aficyjnym kamientarom błoh «Otražienije» źviarnuŭsia ŭ pres-słužbu Śledčaha kamiteta pa Minskaj vobłaści. Tam kazać pra situacyju admovilisia. Atrymać apieratyŭny kamientar u pres-słužbie Ministerstva abarony nie ŭdałosia.
