Barys Fiłataŭ. Fota: pres-słužba Dniaproŭskaha harsavieta.
Pavodle viersii prakuratury, Barys Fiłataŭ, budučy słužbovaj asobaj, arhanizavaŭ zdymańnie dziaržaŭnaha ściaha Biełarusi, raźmieščanaha la ŭvachodu ŭ budynak haradskoj rady, zamianiŭšy jaho na bieł-čyrvona-bieły. Tym samym, jak ličać prakurovy, jon «paździekavaŭsia nad histaryčnaj i kulturnaj relikvijaj i tym samym pryniziŭ nacyjanalny honar i hodnaść biełarusaŭ».
Takija dziejańni biełaruskija prakurory kvalifikavali pa č. 2 art. 130 Kryminalnaha kodeksa Respubliki Biełaruś, zaviali kryminalnuju spravu i nakiravali jaje ŭ Śledčy kamitet.
Sam Barys Fiłataŭ siońnia adkazaŭ na patrabavańnie biełaruskaj ambasady prynieści prabačeńni «biełaruskamu narodu»:
«Razumiejecie, my žyviem u svabodnaj krainie. Tak, u našaj krainie masa prablem, ale ŭ joj lohka dychać.
Naprykład, u nas, u adroźnieńnie ad Biełarusi, Prezident nie pryznačaje kiraŭnikoŭ horada. Bolš taho, my našamu Prezidentu nie padparadkoŭvajemsia. My — asobnaja halina ŭłady. My — miascovaje samakiravańnie.
Va Ukrainie prezident nie kamanduje merami i municypalitetami, taksama mery i municypalitety nie kamandujuć hramadzianami.
U nas kožny hramadzianin moža vyjści da meryi z płakatam: «Bora, kali ty ŭžo zdochnieš?», i jamu za heta ničoha nie budzie. Jaho nie pabjuć pałkaj amapaŭcy i jaho nie pasadziać u kamieru.
Tak, biezumoŭna, Boru takija płakaty mohuć nie padabacca, ale demakratyja Boru padabajecca bolš. Tamu, kali miascovaja moładź ustalavała kala meryi fłahštoki sa ściahami nacyjanalnych supołak, to jana maje prava hetyja ściahi mianiać tak, jak joj zachočacca. Tym bolš što, u adroźnieńnie ad nacysckaj i kamunistyčnaj simvoliki, bieł-čyrvony-bieły ściah nie źjaŭlajecca zabaronienym u Ukrainie. Tamu moładź moža viešać u meryi lubyja ściahi, jakija zachoča.
I «ułady Dniapra» tut moładzi nie ŭkaz. Tamu, što my žyviem u svabodnaj krainie. My hanarymsia tym, što my žyviem u svabodnaj krainie.
I hatovyja jaje abaraniać. Choć heta, napeŭna, vam dakładna hetaha nie zrazumieć. Ni ŭ Rasiei, ni ŭ Biełarusi».
Čytajcie taksama:
Biełaruś uručyła notu pratestu Ukrainie za zamienu čyrvona-zialonaha ściaha kala meryi Dniapra na bieła‑čyrvona‑bieły
Pasolstva Biełarusi ŭ Ukrainie: Biełarusy staviacca da čyrvona-zialonaha ściaha z trymcieńniem
Ściah Biełarusi kala meryi ŭkrainskaha Dniapra zamianili na bieła-čyrvona-bieły
