«Hulnia pra kamunikatyŭnaje nadvorje pamiž ludźmi»
«Naša nastołka — pra žyćcio, pra toje, jak zrazumieć adzin adnaho i razam zrabić niešta fajnaje. Jak palepšyć svajo žyćcio ŭ horadzie i jakija dla hetaha jość prostyja, ale efektyŭnyja instrumienty», — kaža kamanda (čalcy pažadali zastacca ananimnymi).
Ideja hulni «nadvorʼe» źjaviłasia na pačatku 2021 hodu, kali stała vidavočna, što ŭ dvarovych supołkach uźnikaje dyskamunikacyja pamiž ludźmi, bo ŭ ich raniej nie było praktyki kamunikacyi pamiž saboj, kažuć raspracoŭščyki i raspracoŭščycy.
«Ludzi nie z supołak nie viedajuć, jak možna razmaŭlać z susiedziami i susiedkami, jak dałučycca da inicyjatyŭ, jak niešta źmianiać u dvarovym asiarodździ. A hulnia dapamahaje pahladzieć na matyvacyju adzin adnaho, navučycca kamunikavać ź vielmi roznymi ludźmi i troški paznajomicca z urbanistykaj dy horadam. Jana nie vučyć, a matyvuje vučycca».
Uzrostavych abmiežavańniaŭ u hulni niama, ale zusim małym dzietkam budzie ciažkavata, bo praviły bolš-mienš składanyja, kaža kamanda.
Metaŭ u «nadvorʼe» šmat. Pieršaja — sabrać ludziej «za adnym stałom»: susiedziaŭ dy susiedak, supołki, siabroŭ i siabrovak, dy navat nieznajomych pamiž saboj haradžan dy haradžanak. Paznajomicca, abmianiacca svaimi mierkavańniami i historyjami.
«Taksama my spadziajomsia, što hulnia zacikavić ludziej u palapšeńni svaich dvarovych prastoraŭ. Na finišy hulcy nie zmohuć zastacca biez novych viedaŭ! Hulniavaja forma navučańnia ŭ pryjemnym dy prostym farmacie paznajomić ludziej ź instrumientami, jakija dastupnyja kožnamu i kožnaj i z dapamohaj jakich haradžanie dy haradžanki mohuć źmianiać svaje dvary».
Hulcam stanie bolš zrazumieła, jak kamunikavać i supracoŭničać z samymi roznymi susiedziami dy susiedkami, jak vyrašać kanflikty.
«Jany raźbiarucca, jak vyrašać pytańni dobraŭparadkavańnia dy samakiravańnia. Daviedajucca pra krytery Jana Hiejła (dacki architektar, kansultant pa haradskim dyzajnie i pra elemienty), jakija možna vykarystoŭvać dla palapšeńnia dvara».
Darečy pieršapačatkovaja nazva hulni miełasia być blizkaja da prymaŭki «jak dbajem, tak i majem», bo taja dobra adlustroŭvała źmiest hałoŭnaj idei.
«My abmiarkoŭvali nazvu ŭsioj kamandaj, jak raptam adzin čalec prapanavaŭ «naDVORje». Heta nie pra apadki i temperaturu. Heta chutčej pra kamunikatyŭnaje nadvorje pamiž ludźmi. I, kaniečnie, tut zachavana słova «dvor». I nam vielmi spadabałasia, što takaja nazva namiakaje na siužet, ale ŭsio ž pakidaje miesca dla intryhi. Da taho ž atrymlivajecca, što navat nazva — heta taja ž samaja hulnia, ale słovaŭ. Tamu spynilisia na hetym troški žartoŭnym varyjancie».
«Kiroŭca z našaj hulni moža vielmi nahadać tatu ŭdzielnika kamandy»
Kiroŭca, babula, ravarystka i šmat chto jašče. Piersanažy «nadvorʼe» — heta ludzi, jaki jość u kožnym dvary.
«Nam vielmi chaciełasia, kab hulcy adčuvali, nibyta sapraŭdy apynulisia ŭ znajomym dvary, tamu ŭsie piersanažy majuć pratatypy z realnaha žyćcia. My praanalizavali, chto ŭvohule žyvie ŭ dvary, kaho tam možna sustreć. I takim čynam znajšli 5 hałoŭnych piersanažaŭ. Ale heta nie ŭsie persony hulni: taksama jość architektar, padletak, staršynia TUŽ i inšyja haradžanie dy haradžanki. Kali my prapisvali piersanažaŭ, my ničoha nie vydumlali, a zmaloŭvali sa znajomych. Paciešny fakt: kiroŭca z našaj hulni moža vielmi nahadać tatu adnaho z udzielnikaŭ kamandy».
Bližej paznajomicca ź piersanažami možna na sajcie Mienskaj urbanistyčnaj płatformy, jakaja dapamahaje kamandzie z raspaŭsiudam infarmacyi pra hulniu.
Padčas pracy nad hulnioj uźnikała šmat składanaściaŭ, pryznajecca kamanda.
«My vyrašyli raspracavać paŭnavartasnuju nastolnuju hulniu za 7—8 miesiacaŭ, ale potym užo daviedalisia, što takija idei pieratvarajucca ŭ realnaść za niekalki hadoŭ. Taksama vielmi doŭha šukali miechaniku, jakaja budzie jadnać, a nie raźjadnoŭvać, sutyknulisia sa składanaściami i padčas testavańnia. Nu, i vyrašyli drukavać hulniu pad kaniec hodu, kali ŭ drukarni miljon zamovaŭ i prablem i biez nas».
Ale nie abyšłosia i bieź cikavych momantaŭ.
«Spačatku adzin z kampanentaŭ hulni my chacieli zakazvać na vytvorčaści ŭ Kitai, ale ŭ apošni momant jany pierastali vychodzić na suviaź. Tady čałaviek ź Mienska, jaki vielmi zachaplajecca nastolnymi hulniami, vyrašyŭ pačać svaju vytvorčaść fišak i admysłova pad nas vyrabiŭ patrebnyja kampanienty. Jak jon sam raskazvaje, u jaho była takaja dumka daŭno, ale my stali katalizataram. Ciapier jon płanuje praciahvać raźvivacca ŭ hetym kirunku».
Jak pahulać u «nadvor'e»?
Hulnia z samaha pieršaha kroku vučyć kamunikacyi, bo «nadvor'e» nielha nabyć, a tolki znajści ŭ susiedziaŭ i susiedak, u supołkach.
«My chacieli, kab jak maha bolš ludziej pahulali ŭ «nadvor'e», tamu prydumali cikavy miechanizm ź pieradavańniem hulni. Za jaje nie treba płacić, ale treba znajści tuju supołku ci susiedziaŭ/susiedak, u jakich jość skrynia z hulnioj, i paprasić pahulać. Hetki bukkrosinh atrymlivajecca».
Kab pratestavać «nadvor'e» pieršymi, treba koratka raskazać u huhł-formie, čamu vy chacieli b pahulać u jaje. Aŭtaram i aŭtarkam adkazaŭ ź cikavaj matyvacyjaj adpraviać hulniu na test.
«Ludziam stała važna i navat nieabchodna adčuvać datyčnaść da ŭsiaho biełaruskaha»
Kamanda adznačaje, što za apošnija dva hady mocna pavysiłasia cikavaść da ŭsiaho biełaruskaha: movy, padziejaŭ i navin, prajektaŭ, jakija stvarajuć biełarusy.
«Nasamreč, heta nam pakazvajuć i matyvacyjnyja listy, jakija my ciapier atrymlivajem. Ludziam stała važna i navat nieabchodna adčuvać datyčnaść da ŭsiaho biełaruskaha. Tamu hulnia na biełaruskaj movie, padčas jakoj ty pieratvaraješsia ŭ žychara ci ŭ žycharku adnaho z typovych biełaruskich dvaroŭ, zadavalniaje hety zapyt i zacikaŭlenaść».
Taksama kamanda zaŭvažaje, što haradžanie i haradžanki pačali samastojna prychodzić da razumieńnia, što haradskoje asiarodździe, asabliva dvarovyja prastory, u peŭnaj stupieni zaležać ad dziejańniaŭ samich žycharoŭ dy žycharak.
«Vielmi važna hetaje razumieńnie padtrymlivać i pašyrać. A hulnia zdajecca vielmi efiektyŭnym i nie nadakučlivym sposabam heta rabić. Da taho ž ciapier siarod pastajannych chvalavańniaŭ dy nia vielmi badziorych navin ludziam jak nikoli patrebna padtrymka adno adnaho, prostyja sustrečy i razmovy, i voś takija pazityŭnyja sposaby bavić čas. Heta moža stać nievialičkim aktam terapii».
Ciapier kamandzie patrebnaja padtrymka. I voś što kožny moža zrabić dla «nadvor'e»:
Dapamahčy z raspaŭsiudam
«My ciapier prosim ludziej nie trymać hulniu ŭvieś čas tolki ŭ siabie, a pieradavać dalej siabram, siabroŭkam dy znajomym ź inšych rajonaŭ dy haradoŭ Biełarusi. Heta dapamoža vyrašyć pytańnie ź nievialikaj (pakul što) kolkaściu asobnikaŭ, ale taksama dazvolić uzmacnić haryzantalnyja suviazi jak siarod hulcoŭ, tak i siarod haradžan i haradžanak uvohule».
Napisać matyvacyjny list
«Kab atrymać hulniu «na test». Kali ŭ vas budzie cikavaja matyvacyja, vam adpraviać hulniu. My budziem bačyć šmat popytu i zrazumiejem, što hulnia aktualnaja. A popyt, jak viadoma, naradžaje prapanovu».
Pakinuć vodhuk
«U vypadku, kali vy atrymali hulniu, nie zabudźciesia pakinuć vodhuk, kab my zmahli zrabić jaje jašče lepšaju! U instrukcyi padrabiazna napisana, jak heta zrabić».
