Padčas sustrečy.
Śviatłana Cichanoŭskaja zaklikała deputataŭ Viarchoŭnaj Rady Ukrainy paspryjać spynieńniu supracy ŭkrainskich pravaachoŭnych orhanaŭ ź biełaruskimi «karnymi» słužbami.
«Ukraina nie pryznała lehitymnaść Łukašenki, i važna być paśladoŭnymi ŭ hetym hodnym vybary. Nie supracoŭničać z karnymi orhanami, nie vieści spravy z tymi, chto zajmajecca palityčnym pieraśledam biełarusaŭ», — skazała Śviatłana Cichanoŭskaja siońnia padčas videasustrečy z deputatami mižfrakcyjnaha abjadnańnia «Za demakratyčnuju Biełaruś» u Viarchoŭnaj Radzie Ukrainy.
Jak paviedamili ŭ presavaj słužbie Śviatłany Cichanoŭskaj, jana taksama źviarnułasia da ŭkrainskich deputataŭ z prośbaj realizavać mahčymaść nadańnia biełarusam-uciekačam statusu časovaj abarony, jaki praduhledžany ŭkrainskim zakonam ab uciekačach i asobach, što patrabujuć dadatkovaj ci časovaj abarony.
«Navat kali ludziej niemahčyma zabiaśpiečyć žytłom i materyjalnaj padtrymkaj, taki status dazvolić hramadzianam Biełarusi lehalna znachodzicca i pracavać va Ukrainie»,
— adznačyła jana.
Śviatłana Cichanoŭskaja zaklikała deputataŭ spraścić šerah pracedurnych aśpiektaŭ u pracesie lehalizacyi biełarusaŭ, jakija źjechali va Ukrainu ad kryminalnaha pieraśledu ŭ Biełarusi.
Jana taksama adreahavała na vyklik ukrainskaha ambasadara ŭ MZS Biełarusi z nahody nibyta pierachoplenaha ŭkrainskaha bieśpiłotnika.
«Režym zacikaŭleny tolki ŭ eskałacyi napružanaści. Heta dazvalaje jamu adciahnuć uvahu ad prablem, jakija isnujuć u Biełarusi, i apraŭdać represii dy hvałt. Zapeŭnivaju vas, biełarusy ličać ukraincaŭ bratami, i lubyja sproby režymu ŭciahnuć Biełaruś u kanflikt na baku Rasii abiernucca suprać jaho».
U toj ža čas Śviatłana Cichanoŭskaja ličyć zaŭčasnymi vysnovy nakont akupacyi Biełarusi Rasijaj:
«Realnuju acenku my zmožam dać paśla 20 lutaha, kali zrazumiejem, ci pačaŭsia praces vyvadu rasijskich vojskaŭ ź Biełarusi. Tak, pahroza jość, i my pracujem ź mižnarodnymi partniorami, kab, kali havorka idzie ab pahrozach Ukrainie, taksama havaryli i ab pahrozach Biełarusi. Viadoma, my budziem vitać dypłamatyčnaje vyrašeńnie, ale my nie možam dapuścić, kab canoj raźviazańnia kryzisu staŭ biełaruski suvierenitet».
Śviatłana Cichanoŭskaja paviedamiła, što hatovaja naviedać Kijeŭ, a staršynia mižfrakcyjnaha deputackaha abjadnańnia «Za demakratyčnuju Biełaruś» u Viarchoŭnaj Radzie Ukrainy Alaksiej Hančarenka, u svaju čarhu, zajaviŭ, što najbližejšym časam nakiruje ŭ Ministerstva zamiežnych spraŭ Ukrainy zapyt nakont arhanizacyi takoha vizitu.
Alaksiej Hančarenka taksama prapanavaŭ razam pracavać na placoŭcy Parłamienckaj asamblei Rady Jeŭropy, kab aktualizavać pytańnie ab parušeńniach pravoŭ čałavieka ŭ Biełarusi.
«U časie razmovy my napracavali šerah dziejańniaŭ i kirunkaŭ, pa jakich u dalejšym budziem aktyŭna supracoŭničać. Bo volnaja demakratyčnaja Biełaruś — heta harantyja biaśpieki i Ukrainy, i Jeŭropy», — skazaŭ Alaksiej Hančarenka.
Čytajcie taksama:
Śviatłana Cichanoŭskaja sustrełasia ź ministram zamiežnych spraŭ Danii
Cichanoŭskaja sustrełasia z premjeram Litvy ŭ dzień spynieńnia tranzitu kaliju
