Pradstaŭniki kancylaryi raspaviali Češskamu radyjo, što sakretny dakumient byŭ źniščany pamyłkova — razam ź inšymi dakumientami, jakija padlahali źniščeńniu. U aficyjnym paviedamleńni kancylaryi, adnak, pra pamyłku nie havorycca — tam skazana, što ŭsie dakumienty byli źniščanyja ŭ adpaviednaści z praceduraj. Sam prezident incydent pakul nie kamientavaŭ.
Dakumient byŭ pieradadzieny Ziemanu ŭ krasaviku minułaha hoda, niezadoŭha da taho, jak češski ŭrad aficyjna paviedamiŭ, što padazraje ŭ vybuchach rasijan. U dakumiencie, jak śćviardžajecca, tłumačyłasia, čamu padazreńni ŭpali na Alaksandra Miškina i Anatola Čapihu (viadomych taksama jak Rusłan Bašyraŭ i Alaksandr Piatroŭ — heta tyja ž samyja ludzi, jakich brytanskija ŭłady padazrajuć u atručeńni Siarhieja i Julii Skrypalaŭ).
Kamitet pa biaśpiecy češskaha parłamienta ŭžo zajaviŭ, što razhledzić pytańnie ab tym, ci nie parušyła akružeńnie Ziemana zakon. Prezident Zieman, jaki ličycca prarasijskim palitykam, u svoj čas aficyjna padtrymaŭ abvinavačvańni, vyłučanyja ŭ adras rasijskaj raźviedki, ale pry hetym zajaviŭ, što isnujuć i inšyja viersii padziejaŭ u Vrbiecicach. Z-za hetaha jaho raskrytykavali mnohija češskija palityki.
Vybuchi na zbrojevym składzie ŭ Vrbiecicach adbylisia vosieńniu 2014 hoda. U vyniku zahinuli 2 čałavieki, byŭ naniesieny vialiki materyjalny ŭron. Rasija kateharyčna admaŭlaje dačynieńnie da vybuchaŭ.
