Analiz faktaŭ dazvoliŭ manitorynhavaj misii zrabić vysnovy pra parušeńnie takich pravoŭ Viktara Babaryki, jak:
- prava na dostup da abaroncy da suda;
- prava być infarmavanym pra sutnaść pradjaŭlenych abvinavačvańniaŭ;
- prava być asudžanym kampietentnym, niezaležnym i biesstarońnim sudom;
- prava na prezumpcyju nievinavataści;
- prava na dastatkovy čas i ŭmovy dla padrychtoŭki da abarony;
- prava vykliku i dopytu śviedak.
Zychodziačy z praviedzienych nazirańniaŭ i infarmacyi, jakija prahučała ŭ sudovych pasiadžeńniach, u spravazdačy kanstatavanaja pradvyznačanaść vynikaŭ pracesu i pakarańnie za ŭdzieł Babaryki ŭ vybarčaj kampanii.
Manitorynhavaja misija zrabiła vysnovu, što sukupny šerah parušeńniaŭ u chodzie pracesu akazaŭ niehatyŭny ŭpłyŭ na spraviadlivaść sudovaha razhladu pa spravie Babaryki, što ŭ rešcie rešt mahło stać istotnym faktaram jaho asudžeńnia.
Na asnovie praviedzienaha nazirańnia i vyjaŭlenych parušeńniaŭ aŭtary spravazdačy adznačajuć:
«Palityčny kantekst u spałučeńni z apisanymi parušeńniami pryvodzić nas da vielmi surjoznych aściarohaŭ, što abvinavačvańnie i sud nad spadarom Babarykam byli vyklikanyja nienaležnymi matyvami, što ŭjaŭlaje saboju złoŭžyvańnie pracesam».
«Fond Kłuni za spraviadlivaść» (Clooney Foundation for Justice) zasnavany halivudskim akcioram Džordžam Kłuni i jahonaj žonkaj — jurystkaj Amal Kłuni. Adnoj ź inicyjatyvaŭ fondu źjaŭlajecca TrialWatch — manitorynh kryminalnych sudovych pracesaŭ u roznych krainach z metaj vykryćcia niespraviadlivaści i prasoŭvańnia viaršenstva prava.
Poŭny tekst spravazdačy na anhlijskaj movie dastupny tut.
