Imša pamiaci Skaryny ŭ Prazie. Fota: fejsbuk Dźmitryja Hureviča.
20 studzienia z udziełam ctaršyni Kanfierencyi katalickich biskupaŭ u Biełarusi, biskupa Viciebskaha Aleha Butkieviča ŭ kaściole śviatoha Andreja Baboli ŭ Połacku adznačyli 500-hodzie vydańnia Franciškam Skarynam «Małoj padarožnaj knižycy».
Z hetaj nahody ŭ rodnym horadzie pieršadrukara adbyłasia ŭračystaja celebracyja, u jakoj razam z kiraŭnikom biełaruskaha katalickaha jepiskapata malilisia śviatary łacinskaha i ŭschodniaha abradaŭ, połackija parafijanie i hości.
Jak paviedamlaje Catholicnews.by, u pastyrskim słovie da viernikaŭ biskup Butkievič adznačyŭ:
«Francišak Skaryna źjaŭlajecca dla nas prarokam; tym, chto ŭ svaim žyćci pieradusim prahnuŭ žyć Božym słovam i im dzialicca».
«Małaja padarožnaja knižyca» — heta zbor psałmoŭ i malitvaŭ, vydadzieny Franciškam Skarynam u 1522 hodzie ŭ Vilni. Jana stała, fatyčna, pieršym malitoŭnikam na rodnaj movie dla śvieckich viernikaŭ. Hetaje ŭnikalnaje vydańnie, jak i mnohaje z taho, što rabiŭ vialiki dziejač Adradžeńnia, apiaredziła svoj čas i źjaŭlajecca nacyjanalnym duchoŭnym skarbam našaha naroda.
Padobnyja nabaženstvy ŭ hety dzień prajšli taksama ŭ Minsku, Vilni, Prazie, Padui i Varšavie, a ŭ Litvie 2022-y hod abvieščany Hodam Skaryny.
Na imšy ŭ stalicy Čechii, u bazilicy śviatych Piatra i Paŭła, arcybiskup Prahi kardynał Daminik Duka paraŭnaŭ Skarynu sa stvaralnikami internetu i nazvaŭ jaho vialikim jeŭrapiejskim humanistam, ź jakoha pavinny brać prykład sučasnyja jeŭrapiejcy, jakija zabyvajuć, dzie ich karani.
«Skaryna z Połacku, jaki vučyŭsia ŭ Krakavie i Padui, pracavaŭ u Prazie i Vilni, heta ŭzor jeŭrapiejca, jaki złučaŭ hetyja harady i rehijony, skazaŭ češski prymas. A svajoj drukarskaj dziejnaściu paŭpłyvaŭ nie tolki na biełaruskuju ci ŭkrainskuju movu, ale i češskuju. Kardynał Duka maliŭsia za biełarusaŭ, kab pamiatali pra svaje karani i viedali, kudy jany iduć, a taksama za toje, kab biełaruskija ŭciekačy jak maha chutčej viarnulisia na radzimu», — napisaŭ u Fejsbuku Dźmitryj Hurnievič.
