«My śćviardžajem, što abvinavačanyja ažyćciavili składanuju schiemu pa insceniroŭcy pahrozy vybuchu bomby, jakaja vymusiła samalot ździejśnić ekstrannuju pasadku ŭ ich krainie, kab jany mahli aryštavać žurnalista-dysidenta»,
— pryvodziacca słovy Majkła Dryskała ź Ńju-Jorkskaha adździaleńnia FBR u relizie Departamienta justycyi.
«Mała taho, što zdareńnie źjaŭlajecca parušeńniem zakonaŭ ZŠA, heta jašče i nadzvyčaj niebiaśpiečna dla ŭsich, chto lotaje samalotam. Nastupny piłot, jaki atrymaje sihnał biedstva ad dyśpietčaraŭ, moža ŭsumnicca ŭ sapraŭdnaści nadzvyčajnaj situacyi, što stavić pad pahrozu žyćci ludziej. FBR i našy zamiežnyja partniory buduć pryciahvać vinavatych da adkaznaści za dziejańni, jakija niepasredna pahražajuć žyćciu hramadzian ZŠA i staviać pad pahrozu stabilnaść našaj nacyjanalnaj biaśpieki», — skazaŭ Majkł Dryskał.
Jak śćviardžajecca ŭ zaklučeńni, kiraŭnik «Biełaeranavihacyi» Čuro asabista paviedamiŭ ab nieisnujučaj pahrozie vybuchu minskim dyśpietčaram jašče da taho, jak rejs vylecieŭ z Afin, i daŭ im ukazańnie nakiravać rejs u Minsk u adkaz na mierkavanuju pahrozu.
Jaho namieśnik Kaziučyc nibyta ŭkazaŭ biełaruskim orhanam falsifikavać spravazdačy ab hetym incydencie, kab nichto nie daviedaŭsia, što pahroza vybuchu była niesapraŭdnaj, i kab nichto nie daviedaŭsia pra rolu biełaruskich śpiecsłužbaŭ.
U spravazdačy zhadvajecca pra dvuch supracoŭnikaŭ biełaruskich śpiecsłužbaŭ.
Nieviadomy supracoŭnik i Leanid Čuro ranicaj, kali samalot jašče navat nie vylecieŭ z Afin, prybyli ŭ minski Centr kiravańnia pavietranym rucham i paviedamili dziažurnym dyśpietčaram ab mierkavanaj pahrozie vybuchu. Jany, jak miarkujuć u spravazdačy, imitavali pahrozu, kab prymusić piłotaŭ rejsa paźbiahać pasadki ŭ Vilni, bo kali samalot siadzie ŭ tam, śćviardžali jany, to bomba vybuchnie.
Akramia taho, Čuro i nieviadomy supracoŭnik śpiecsłužbaŭ nibyta nakiravali rejs śpiecyjalna ŭ Minsk. Niahledziačy na toje, što samalot usio jašče znachodziŭsia ŭ pavietranaj prastory Ukrainy, jany byccam by zabaranili minskim dyśpietčaram pieradavać paviedamleńni ŭkrainskim uładam ab pahrozie vybuchu, havorycca ŭ zaklučeńni.
Nieviadomy rabotnik śpiecsłužbaŭ zastavaŭsia ŭ zale Centra kiravańnia pavietranym rucham, kab pierakanacca, što płan byŭ paśpiachova vykanany. Hety siłavik u režymie realnaha času infarmavaŭ svajho načalnika Andreja Anatoleviča ab chodzie vykanańnia apieracyi. U niejki momant jon vykazvaŭ zaniepakojenaść, što piłoty mohuć śpiecyjalna ciahnuć čas, kab samalot usio ž urešcie rešt vylecieŭ z terytoryi Biełarusi.
Jak tolki rejs dasiahnuŭ pavietranaj prastory Biełarusi, rabotnik śpiecsłužbaŭ daručyŭ staršamu dyśpietčaru pavietranaha ruchu prainfarmavać piłotaŭ ab mierkavanaj pahrozie vybuchu, apisać, što pahroza była adpraŭlenaja pa elektronnaj pošcie, zrabić usio, kab jana zdavałasia praŭdapadobnaj, i prymusić rejs sieści ŭ Minsku. Siłavik prymusiŭ dyśpietčara skazać piłotam, što pahroza adnosicca da «čyrvonaha» ŭzroŭniu.
U vyniku piłoty rejsa abviaścili nadzvyčajnuju situacyju i pieranakiravali samalot u Minsk.
Jak tolki rejs pryziamliŭsia, nieviadomy siłavik pakinuŭ dyśpietčarskuju i nakiravaŭsia na ŭźlotna-pasadačnuju pałasu aeraporta. Jon naziraŭ za siłami biaśpieki, kantralujučy dahlad pasažyraŭ pry ich vysadcy. Zatym supracoŭniki biełaruskich śpiecsłužbaŭ prainstruktavali pasažyraŭ sieści ŭ adzin ź niekalkich pasažyrskich aŭtobusaŭ aeraporta.
Siłaviki sieli ŭ adzin z aŭtobusaŭ i paprasili Pratasieviča pradstavicca. Tym samym jany pakazali, što viedali pra Pratasieviča na rejsie. Jaho vyvieli z aŭtobusa, abšukali na ŭźlotna-pasadačnaj pałasie aeraporta. Zatym siłaviki praviali Pratasieviča nazad u aŭtobus i pajechali ź im i astatnimi pasažyrami ŭ terminał aeraporta.
Jak tolki aŭtobus prybyŭ u terminał, siłaviki sustreli Pratasieviča, adviali jaho ŭ bok ad astatnich pasažyraŭ i zatrymali.
Safiju Sapiehu taksama adździalili ad inšych pasažyraŭ i zatrymali.
Nieŭzabavie biełaruskija čynoŭniki pačali ŭtojvać akaličnaści incydentu. 24 maja 2021 hoda, na nastupny dzień, Čuro razam ź inšymi biełaruskimi aficyjnymi asobami źjaviŭsia na pres-kanfierencyi z nahody pasadki samalota ŭ Minsku. Jon zajaviŭ, što biełaruskija ŭłady «zrabili ŭsio ŭ adpaviednaści sa svaimi słužbovymi abaviazkami» pry arhanizacyi palotu».
Kaziučyc daručyŭ biełaruskim orhanam pavietranaha ruchu stvaryć falšyvyja spravazdačy ab incydencie, havorycca ŭ spravazdačy.
U ZŠA Čuro, Kaziučyc, «Andrej Anatolevič» i nieviadomy rabotnik śpiecsłužb abvinavačvajucca ŭ zmovie z metaj ździajśnieńnia avijacyjnaha piractva. Im pahražaje ad 20 hadoŭ da pažyćciovaha źniavoleńnia.
Ekśpiert ab spravazdačy ISAO pa samalocie: Nie vyklučaju, što asobnyja sankcyi buduć asłablenyja
Piłotam nie dali častaty dla suviazi ź Vilniaj. Źjavilisia novyja fakty pra pasadku «Rajanejra» z Pratasievičam
New York Times: Avijadyśpietčar źbieh ź Biełarusi ŭ Polšču i raskazaŭ pra pasadku Ryanair
