Łužycki muzyčny prajekt Hara Crash zapisaŭ videarolik ź pieśniaj «Swojowola» («Svavola») u padtrymku biełarusaŭ, jakija zmahajucca za svabodu.
«Hara Crash» — bierlinski elektronny prajekt Uty Švejdzic i jaje muža Michała. Jany aboje z Łužycy (rehijon na paŭdniovym uschodzie Hiermanii) i ŭ pieśniach časta vykarystoŭvajuć svaju rodnuju movu.
Prajekt uźnik u 2018 hodzie, užo zapisana dva albomy.
Muzyki majuć davoli ščylnyja kantakty ź biełaruskaj kulturaj. Uta sa svaim papiarednim prajektam «Berlinska Dróha» adyhrała siem kancertaŭ u Biełarusi, taksama časta vystupała na adnoj scenie ź biełaruskimi hurtami «Sciana» i «Dzieciuki».
Padziei 2020 hodu Uta i Michał taksama nie abminuli uvahaj, tym bolš što pad represii trapili i ichnija siabry. Mienavita tamu muzyki vyrašyli zapisać pieśniu i źniać na jaje klip.
Łužyčanie — čaćviorty zachodniesłavianski narod, razam z palakami, čechami i słavakami. Ich samanazva sorby ci sierby, tamu ichniuju movu časam nazyvajuć sierbałužyckaj.
Praŭda, mova dzielicca na dźvie: vierchnia- i nižniałužyckuju. Historyki tłumačać, čamu tak. Heta nasamreč naščadki dvuch zusim roznych słavianskich plamion, adno ź jakich pryjšło siudy z Dunaja z roźnicaj u paru stahodździaŭ. Choć jany i žyli pobač paŭtara tysiačahodździa, ale roźnica pamiž imi zachavałasia.
Abiedźvie łužyckija movy znachodziacca pad pahrozaj vymirańnia: u Nižniaj Łužycy łužyckaj karystajucca tolki niekalki tysiač čałaviek, u Vierchniaj na joj umiejuć havaryć niekalki dziasiatkaŭ tysiač. Pieśnia Uty i Michała — pa vierchniałužycku.
Pra Łužycu i łužyčan hladzicie bolš u № 6/2021 časopisa «Naša historyja». Hety numar pakul jašče možna nabyć u minskich kniharniach «Halijafy» i «Knižnaja šafa», u handlovym centry «Kupałaŭski», etnakramie «Rahna», internet-kramach knihi.by, kniganosha.by, mmkut.by.
