Izrailskaja presa paviedamlaje padrabiaznaści vyzvaleńnia advakatki Mai Rajten-Stol: paśla zvanka prezidenta Hiercaha Łukašenku ŭ Minsku apieratyŭna adbyŭsia sud nad advakatkaj, jakaja abvinavačvałasia ŭ kantrabandzie narkotykaŭ (miedycynskaja marychuana) i była prysudžanaja da štrafu ŭ pamiery 2 500 dalaraŭ ZŠA.
Biełarusy pry takim ža abvinavačvańni zvyčajna atrymlivajuć doŭhija hady turemnaha źniavoleńnia, a samo śledstva doŭžycca miesiacami.
Svaju leptu ŭ vyzvaleńnie Rajten-Stol unieśli kiraŭnik MZS Izraila Jair Łapid i ministr finansaŭ Avihdor Libierman, u jakoha daŭnija suviazi ŭ kiraŭnictvie Biełarusi.
Maja Rajten-Stol. Fota: kan.org.il
Jak śćviardžaje historyk Alaksandr Frydman, jaki paviedamiŭ pra heta ŭ svaim telehram-kanale:
«Historyja Rajten — takoje pasłańnie Łukašenki krainam Zachadu: u Minsku hatovyja da pramych pieraahavoraŭ pra los źniavolenych, a zvanok samomu Łukašenku dazvolić apieratyŭna vyrašyć prablemy.
Pry hetym, adnak, varta padkreślić adnu važnuju asablivaść: sprava Rajten-Stol nie nasiła palityčny charaktar».
Maja Rajten-Stol kala budynka suda paśla vyzvaleńnia. Fota izrailskaj haziety Ynet
Izrailskuju advakatku na pačatku listapada zatrymali ŭ minskim aeraporcie z 2,5 hrama marychuany, jakija jana, zhodna z receptam tamtejšaha doktara, vykarystoŭvała jak lek. U Biełarusi ž heta — kryminalnaje złačynstva.
Čamu prezident Izraila Hiercah zvaniŭ Łukašenku?
