Sajuznaja dziaržava vałodaje biudžetam, jaki paśpiachova asvojvajecca. U 2021 hodzie jon skłaŭ 160,9 miljona rubloŭ. Dachody hetaha biudžetu — štohadovyja adličeńni ad Biełarusi (35%) i Rasii (65%), piša telehram-kanał «Našy hrošy».
Kudy iduć hrošy? Nasamreč — heta vielmi važny pakazčyk, jaki adlustroŭvaje pryjarytety, jakija staviać pierad saboj dźvie krainy.
Kali pahladzicie na raźmierkavańnie vydatkaŭ sajuznaha biudžetu ŭ 2021 hodzie, to sa ździŭleńniem ubačycie, što samymi zatratnymi halinami apynulisia «pravaachoŭnaja dziejnaść i biaśpieka», na jakija vydzialajecca 48 młn rubloŭ (kala 30% ad ahulnaj sumy) i ŚMI — 29,2 młn rubloŭ, abo 18% ad ahulnaha biudžetu.
Dalejšyja pryjarytety raźmierkavalisia nastupnym čynam:
«orhany Sajuznaj dziaržavy» — 25,8 młn rubloŭ, abo 16% ad ahulnaj sumy, «fundamientalnyja daśledavańni» — 20,4 młn rubloŭ, abo 13% ad ahulnaha biudžetu, «praduchileńnie i likvidacyja nadzvyčajnych zdareńniaŭ» — 14,4 młn, abo 9% «vajenna-techničnaje supracoŭnictva» — 9,4 młn rubloŭ, abo 6%.
Paśla nieskładanych padlikaŭ možam zrabić vysnovu, što 70% biudžetu sychodzić na armiju, čynoŭnikaŭ, milicyju i praŭładnyja ŚMI.
A jak ža navuka i inavacyi? Jak my bačym, bolš za ŭsio pašancavała «fundamientalnym daśledavańniam», usie astatnija artykuły vydatkaŭ vyhladajuć zusim niaznačna. Adukacyja — 2,9 młn, abo 2%, transpart, infarmatyka i suviaź — 3,4 młn, abo 2%, mastactva, kultura, kino — 2,4 młn, abo 1%.
Pryčym, kali my pahladzim danyja ŭ dynamicy, to ŭbačym, jak pryjarytety mianialisia. Tak, naprykład, pravaachoŭnaja dziejnaść u 2017 hodzie «źjadała» tolki 7% sajuznaha biudžetu, vajskova-techničnaje supracoŭnictva — 0,5%, vydatki na čynoŭnikaŭ zajmali 13%. Zatoje raniej kala 20% biudžetu zajmała pramysłovaść —siońnia jana naohuł źnikła z vydatkaŭ.
Kultura ŭ lepšyja hady mahła pretendavać na 4%.
Voś vam i realnyja pryjarytety supracoŭnictva dźviuch mirnych dziaržaŭ «dla naroda». Nichto ich nie chavaje.
