Što viadoma pra pakazalnuju spravu?
Złačynstva było ździejśnienaje 10 vieraśnia 2020 hoda. Paciarpieły milicyjant prybyŭ na vyklik i čakaŭ śledčych, pakolki ŭ kvatery znajšli trup. Padazravanaja ŭ zabojstvie ŭ hety čas sypała abrazami u adras milicyjaniera i jaho kaleh.
Jak paviedamlaje sud, žančyna maje zaležnaść ad ałkaholu (joj navat pryznačyli prymusovaje lačeńnie), raniej užo mieła prablemy z zakonam (nie płaciła alimienty na dziaciej).
Spačatku jaje i jašče adnaho čałavieka zatrymali pa padazreńni ŭ zabojstvie. 22 vieraśnia 2020 hoda jaje asudzili za naniasieńnie ciažkich cialesnych paškodžańniaŭ (č. 3 art. 147 KK), za zabojstva ž u mai 2021 hoda asudzili druhoha fihuranta, zatrymanaha razam ź joj — jon atrymaŭ 16 hod kałonii.
Za abrazu milicyjanta žančynie dali try miesiacy aryštu (art. 369 KK), jakija zhareli za čas znachodžańnia ŭ SIZA (zaličvajecca dzień za dzień).
Cikava, što z abvinavačvańnia prybrali niekalki epizodaŭ: abrazu jašče dvuch milicyjantaŭ (art. 369 KK) i pahrozu hvałtu da ich (art. 364 KK), a taksama zamoŭčvańnie pra złačynstva (art. 406 KK).
Prakuror i paciarpiełyja ŭ sudzie admovilisia ad pretenzij. Palityki ŭ hetaj spravie niama. Žančyna ž maje zaležnaść ad ałkaholu i mieła sudzimaść. Darečy, u Viarchoŭnym sudzie jana asprečvała mienavita prymusovaje lačeńnie ad ałkahalizmu i nie admaŭlała, što sapraŭdy abraziła milicyjaniera.
Abraza pradstaŭnika ŭłady (art. 369 KK) karajecca štrafam, abo abmiežavańniem svabody («chimija) na termin da troch hod, abo pazbaŭleńniem svabody na taki ž termin sa štrafam.
A jak karajuć za takija złačynstvy palitviaźniaŭ?
Jak praviła, niekalkimi hadami «chimii» (chatniaj ci realnaj), heta ličycca bolš strohim pakarańniem.
Voś niekalki prykładaŭ. Uładzimir Suško sa Žłobina asudžany pa art. 369 KK za abrazu supracoŭnika milicyi ŭ Telehramie da dvuch hadoŭ «chimii».
Žychar Mahilova Alaksandr Žycharevič asudžany za abrazu milicyjanta da dvuch hadoŭ i vaśmi miesiacaŭ «chimii». Pad dopisam, u jakim śćviardžałasia, što milicyjant fabrykuje administracyjnyja spravy, Žycharevič užyŭ mianušku «Plavok».
Minčuk Juryj Karniłovič atrymaŭ try hady «chimii» za abrazu tahačasnaha ministra ŭnutranych spravaŭ Juryja Karajeva. U sudzie kamientaryj nie byŭ ahučany, bo ŭtrymlivaŭ nienarmatyŭnuju leksiku, ale sens zvodziŭsia da taho, što «Karajeŭ spałochajecca chutčej, čym skaža Łukašenku, što budzie vykonvać Kanstytucyju». Paciarpiełaha Karajeva nie dapytvali pa hetaj spravie.
