10 žniŭnia 2020 hoda Śviatłana Cichanoŭskaja i Maksim Znak padyšli da centralnaj vybarčaj kamisii, kab padać dakumienty i apratestavać vyniki. Kala ŭvachodu stajaŭ kardon siłavikoŭ u ciomnych kaściumach z aŭtamatami. Unutry čakali dvoje mužčyn — adnym ź ich byŭ Andrej Paŭlučenka, kiraŭnik apieratyŭna-analityčnaha centra pry Łukašenku.
Mužčyny skazali Znaku adyści, paśla paviali Cichanoŭskuju ŭ ciomny pakoi i začynili dźviery. «Vaša kampanija skončanaja», — skazaŭ joj Paŭlučenka. Joj dali vybar: sieści ŭ turmu i addać syna i dačku na vychavańnie inšym abo nieadkładna pakinuć krainu (užo čakała mašyna).
«Usio, pra što ja mahła dumać, heta pra maich dziaciej», — skazała jana.
Praź niekalki hadzin Cichanoŭskuju pavieli da čornaha vychadu. Jana prajšła mima Znaka. «Vybačaj, Maks», — skazała jana, kali jaje vyšturchali za dźviery.
Mužčyny vieźli Cichanoŭskuju praz horad — u hety čas tam sabralisia pratestoŭcy, niekatoryja skandziravali jaje imia. Heta było nastolki hučna, što zdavałasia, vokny mašyny vibryrujuć.
«Pahladzi, što ty narabiła», — skazaŭ adzin z mužčyn. Praź niekalki chvilin jany byli doma ŭ Cichanoŭskaj, joj skazali sabrać sumku. Tam da jaje dałučyłasia Maryja Maroz, kiraŭnica štaba.
Žančyn pasadzili ŭ mašynu Maryi, Paŭlučenka sieŭ na pasažyrskaje miesca. Milicejskija mašyny supravadžali ich śpieradu i zzadu. Prykładna a treciaj hadzinie nočy jany pryjechali na litoŭskuju miažu, dzie čakali dvoje maleńkich dziaciej Maroz.
Paŭlučenka vyjšaŭ i skazaŭ im prajechać praz pamiežny post, jaki, padavałasia, byŭ padrychtavany da ich prybyćcia. Cichanoŭskaja na imhnieńnie padumała, što jaje mohuć zastrelić, ale mašyna praciahvała ruch.
Na nastupny dzień źjaviłasia toje samaje videa Cichanoŭskaj z kabinieta Jarmošynaj.
U Litvie palityka advieźli na kanśpiratyŭnuju kvateru ŭ Vilniusie. U jaje nie było z saboj ničoha, aproč adzieńnia i nievialikaj sumki z zapasnym słychavym aparatam dla syna. Jana adčuvała, što kinuła pratestoŭcaŭ. «Ludzi vieryli ŭ mianie. Ja adčuvała, što zdradziła im», — skazała Śviatłana.
Žurnalist spytaŭ taksama, ci moža jana ŭjavić, što praź piać hadoŭ usio jašče zmahajecca ź sistemaj Łukašenki. «Ja nie mahu sabie hetaha ŭjavić. Toje, što maje dzieci pražyvuć piać hadoŭ biez baćki — absalutna nie», — adkazała palityk.
Raniej Łukašenka ahučvaŭ svaju viersiju adjezdu Cichanoŭskaj z krainy. Joj zajaŭlaŭ, što jana sama pryjšła da Paŭlučenki i prasiła dapamahčy joj źjechać, a paśla telefanavała Łukašenku, kab toj daŭ joj hrošy.
Čytajcie taksama:
Ci sustrakalisia ŭ Šviecyi Makiej i Cichanoŭskaja?
