Fota: depositphotos.com.
U Biełarusi pryščaplajuć suprać kavidu tolki darosłych. Pry hetym dzieci i padletki časam raspaŭsiudžvajuć kavid navat aktyŭniej, čym darosłyja, bo jany bolš ščylna kamunikujuć adzin z adnym — naprykład, u dziciačych sadkach i škołach. Taksama jość danyja, što ŭ ciapierašniuju chvalu pandemii bolš dziaciej pačali chvareć na kavid ciažka.
Vychodzić, što pryščepka ad kavidu patrebnaja dzieciam nie mienš, čym darosłym?
Kali kazać pra aficyjnyja źviestki, to SAAZ śćviardžaje — dzieci i padletki zvyčajna chvarejuć na kavid nie tak ciažka, jak darosłyja. Tamu, kali jany nie ŭvachodziać u hrupy ryzyki (naprykład, praz najaŭnaść chraničnych chvarob), dziaciej možna vakcyniravać u druhuju čarhu.
Pakul nie chapaje infarmacyi pra toje, jak roznyja vakcyny ad kavidu ŭpłyvajuć na dziaciej, tamu nie isnuje i ahulnych rekamiendacyj pa dziciačaj vakcynacyi. SAAZ śćviardžaje, što zvyčajnaja pryščepka ad Pfizer padychodzić dla dziaciej va ŭzroście ad 12 hadoŭ.
Što z pabočkaj?
Kampanija Pfizer praviała ŭłasnaje daśledavańnie vakcyny, u jakim udzielničali 2268 dziaciej. Zhodna z pracaj, dziciačaja pryščepka ad Pfizer na 91% efiektyŭnaja ŭ tym, što datyčycca pieraduchileńnia simptamatyčnaha kavidu.
Niekatoryja dzieci mieli paśla vakcyny pabočnyja simptomy, naprykład, bol u ruce, lichamanku ci śvierb, a taksama stomlenaść, hałaŭny bol, bol u myšcach ci sustavach. Nazyvajuć i vielmi redkaje, ale ciažkaje ŭskładnieńnie ad vakcyny — mijakardyt (zapaleńnie sardečnaj myšcy).
Adnak ekśpierty vyrašyli, što plusy ad vakcynacyi macniejšyja za ryzyku.
Jaki zamiežny vopyt?
3 listapada ŭ ZŠA kančatkova ŭchvalili vykarystańnie preparata Pfizer dla vakcynacyi dziaciej uzrostam ad 5 da 11 hadoŭ. Jany buduć atrymlivać adnu tracinu ad dozy vakcyny, pryniataj dla padletkaŭ i darosłych. Jak i zvyčajna, vakcynacyja projdzie ŭ dva etapy, pamiž jakimi pavinna budzie prajści try tydni.
Uchvaleńnia Pfizer u ZŠA vielmi čakali ŭ Izraili — miascovy ŭrad taksama žadaje raspačać vakcynacyju dziaciej hetaj pryščepkaj.
U Vialikabrytanii taksama pryščaplajuć dziaciej ad kavidu, praŭda, pakul tolki va ŭzroście ad 12 hadoŭ. U bolšaści vypadkaŭ razmova idzie pra adnu dozu vakcyny. Ale, kali dzicia znachodzicca ŭ hrupie ryzycy ci žyvie z kimści, chto časta kantaktuje z chvorymi na kavid, jano moža atrymać i dźvie dozy pryščepki. Anałahičnaja kampanija vakcynacyi prachodzić u Aŭstralii.
Letam dziciačuju vakcynu ad kavidu pačali vypraboŭvać i ŭ Rasii. Razmova idzie pra kopiju darosłaj vakcyny «Sputnik V» — adroźnieńni buduć tolki ŭ daziroŭcy. Zaraz daśledavańni pryščepki znachodziacca na finalnaj stadyi.
Narešcie, nielha nie zhadać Arhiencinu — tam vyrašyli pryščaplać dziaciej užo ź dziciačaha sadka. Maleńkija arhiencincy va ŭzroście ad 3 da 11 hadoŭ zmohuć atrymać pryščepku kitajskim preparatam Sinopharm.
Miljonam amierykancaŭ dazvolili cuda-terapiju ad kavidu. Što pra jaje viadoma?
Ciažarnaść i kavid: voś što varta viedać
