U pačatku śniežnia 1995-ha dyrektar adnaho ź pinskich pradpryjemstvaŭ atrymaŭ partyju cukru. Jaho pastaŭščyk źbiraŭsia z hrašyma za tavar viarnucca dadomu ŭ Minsk. Adnak ni da Novaha hoda, ni da jubileju svajoj maci ŭ pačatku studzienia małady čałaviek nie viarnuŭsia. Baćki pačali šukać syna.
U hety ž čas u lesie na terytoryi Ukrainy 31 śniežnia 1995 hoda znajšli trup nieviadomaha sa śladami hvałtoŭnaj śmierci. Paźniej u im baćka źnikłaha apaznaŭ syna. Dadatkovy ahlad miesca vyjaŭleńnia cieła dazvoliŭ znajści mietaličnyja askiepki i spuskavy ryčah ad uzryvalnika ručnoj hranaty. Była i varonka ad vybuchu.
Asnoŭny padazravany z žonkaj i małym synam źnik za miežami Biełarusi. Vyśvietliłasia, što jon žyŭ u Rasii jak jaje hramadzianin pad vydumanymi ankietnymi danymi, jakija byli źmienienyja i ŭ členaŭ siamji. Ale biaskonca chavacca pad čužym imiem nie ŭdałosia. Unieści jasnaść dapamahli partretnaja ekśpiertyza i daśledavańnie DNK. U kancy 2019 hoda padazravanaha zatrymali ŭ Rasii, a ŭ krasaviku 2020-ha jaho pieradali Biełarusi.
Śledčyja vyśvietlili, što abvinavačany, jakomu ŭ 1995 hodzie było 26 hadoŭ, nie žadaŭ raźličvacca za pastaŭleny cukar i vymaniŭ paciarpiełaha va Ukrainu. Tam nanios jamu ŭdary dubinkaj i nahami pa hałavie i ciele, a zatym padarvaŭ hranataj RHD-5. Dziejańni fihuranta kvalifikavanyja jak naŭmysnaje zabojstva z karyści, ździejśnienaje sposabam, niebiaśpiečnym dla žyćcia mnohich ludziej.
Sudovaja kalehija pa kryminalnych spravach Bresckaha abłasnoha suda pryznačyła pakarańnie — 14 hadoŭ pazbaŭleńnia voli ŭ papraŭčaj kałonii va ŭmovach uzmocnienaha režymu. Padadzienyja mužčynam i jaho abaroncam apielacyjnyja skarhi sudovaja kalehija pa kryminalnych spravach Viarchoŭnaha suda pakinuła biez zadavalnieńnia. Prysud ustupiŭ u zakonnuju siłu.
