Minsk: «Telefanujcie na nastupnym tydni»
My źviarnulisia ŭ miedustanovy roznych rajonaŭ Minska. U bolšaści prapanujuć «Sputnik» — rasijskaha ci biełaruskaha raźlivu.
U 17-j paliklinicy nie viedajuć, kali zaviazuć kitajskuju vakcynu.
«Skončyłasia litaralna dva dni tamu, ciapier tolki «Sputnik», — kažuć u rehistratury.
Amal tydzień tamu kitajskaja vakcyna skončyłasia ŭ 23-j paliklinicy.
«Jość «Sputnik V», vypuščany ŭ Rasii i ŭpakavany ŭ Biełarusi, i «Sputnik łajt». Kitajskaja nieviadoma kali źjavicca», — apisvajuć situacyju ŭ 5-j paliklinicy.
U 14-j prapanujuć tolki «Sputnik» — rasijski ci ad «Biełfarma».
Skončyłasia kitajskaja vakcyna i ŭ 8-j paliklinicy. Novaja partyja, kažuć, budzie mahčyma praz tydzień-dva.
U 1-j i 26-j paliklinicy, kudy my dazvanilisia, taksama dastupny tolki «Sputnik».
«Kitajskaj vakcyny niama. Vam pieršy kampanient? Patelefanujcie, moža, u piatnicu. Žycharoŭ ź inšaha rajona nie biarom, u nas pakul tolki svaje», — patłumačyli ŭ 30-j paliklinicy.
A voś u 35-j kitajskaja vakcyna jašče zastałasia.
«Možna ź inšaha rajona, prychodźcie z pašpartam», — adkazali ŭ daviedcy.
Toje, što prablema z dastupnaściu kitajskaj vakcyny budzie jak minimum da nastupnaha tydnia, paćvierdzili i ŭ Adzinaj rehistratury stalicy.
«Vakcyna skončyłasia ŭčora, tolki kali ŭ samich paliklinikach zastalisia zapasy. Telefanujcie na nastupnym tydni, na hetym užo nie pastupić. Kali budzie, to spačatku zaviazuć u palikliniki, a paśla ŭ mabilnyja punkty vakcynacyi», — raspaviali tam.
A što ŭ rehijonach?
U niekatorych rajcentrach možna biez prablem zrabić pryščepku kitajskaj vakcynaj. Naprykład, u Vaŭkavysku, kab doŭha nie čakać, prapanujuć papiarednie zapisacca. U Bychavie taja ž situacyja.
U Stolinie ŭ najaŭnaści tolki druhi kampanient kitajskaj vakcyny.
Tym, chto žyvie ŭ Pastavach, prapanujuć rasijskuju pryščepku.
«Kitajskaj zastałosia mała. Moža, na siońnia chopić, a moža i nie», — papiaredžvajuć u Rahačoŭskaj CRB.
