Jeŭraparłamient nahadvaje, što ES nie pryznaje vyniki prezidenckich vybaraŭ 2020 hoda, asudžaje represii, u tym liku suprać ŚMI i pravaabaroncaŭ, zaklikaje da inkluziŭnaha dyjałohu.
Jeŭraparłamient nazyvaje vymušanuju pasadku samalota Ryanair aktam dziaržaŭnaha teraryzmu, asudžaje damoŭlenaści pamiž Łukašenkam i Pucinym ab padrychtoŭcy darožnych kart pa intehracyi.
Deputaty Jeŭraparłamienta zaklikajuć Radu ES pryniać piaty pakiet sankcyj i pačać raspracoŭku nastupnaha pakieta, a taksama ŭzmacnić sankcyi, što ŭžo dziejničajuć, u pryvatnaści, u dačynieńni da kalijnaj i naftavaj siektaraŭ, dziaržaŭnych i pryvatnych kampanij, jakija padtrymlivajuć i finansujuć režym.
Taksama Jeŭraparłamient zaklikaje krainy-členy ES adklikać svaich pasłoŭ ź Minsku dla kansultacyj, zaklikaje mižnarodnyja arhanizacyi, u tym liku MVF, abmiežavać supracoŭnictva i vydaču srodkaŭ.
U dakumiencie havorycca, što:
— Krainy ES nie pryznali prezidenckich vybaraŭ u Biełarusi z-za masavych falsifikacyj;
— Incydent z vykradańniem samalota Ryanair nazyvajecca aktam dziaržaŭnaha teraryzmu;
— Jeŭraparłamient źviartajecca da Jeŭrapiejskaj rady ŭzhadnić u kastryčniku stratehiju bolš rašučych sankcyj u dačynieńni da režymu Łukašenki.
— Prapanujecca ŭviadzieńnie dadatkovych sankcyj na takija siektary, jak stal, draŭnina i chimičnaja pramysłovaść.
— Pašyreńnie sankcyj na ŭsie astatnija dziaržaŭnyja banki i klučavyja kampanii, jak «Biełaruśkalij» i «Biełtelekam».
— Asobna Jeŭraparłamient zaklikaje abjavić słužbovyja asoby KDB Biełarusi na terytoryi ES piersonami non-hrata.
— Inicyjatary rezalucyi prapanujuć krainam ES adklikać na kansultacyi svaich pasłoŭ ź Minska ŭ jakaści palityčnaha sihnału Minsku i prypynić akredytacyju biełaruskich dypłamataŭ u ES. Całkam spynić zaprašeńnie słužbovych asob na mižnarodnyja dvuchbakovyja mierapryjemstvy, u tym liku i parłamientaryjaŭ.
— Kali Rasija budzie praciahvać svaju ciapierašniuju palityku ŭ dačynieńni da Biełarusi, zajaŭlajecca pra hatoŭnaść uviadzieńnia dapaŭnialnych mier strymańnia ŭ dačynieńni da Rasii.
— Rezalucyja padtrymlivaje dziejnaść demakratyčnych sił Biełarusi Śviatłany Cichanoŭskaj, Kaardynacyjnaj rady i Narodnaha antykryzisnaha ŭpraŭleńnia.
— Jeŭraparłamient prapanuje vykarystoŭvać pryncyp univiersalnaj kryminalnaj jurysdykcyi dla asudžeńnia Alaksandra Łukašenki i členaŭ jaho režymu asabista za ździejśnienyja złačynstvy suprać naroda Biełarusi i prapanuje pieradać pytańnie pa Biełarusi dla razhladu ŭ Mižnarodnym kryminalnym Sudzie.
— Jeŭraparłamient zaklikaje ŭsie pradpryjemstvy ES u suviazi z parušeńniem pravoŭ čałavieka ŭ Biełarusi ŭstrymacca ad lubych novych inviestycyj u Biełarusi.
