Pierad hałoŭnym korpusam BDU
Paviedamleńni ab nibyta bombie ŭ budynku atrymali mnohija ŭniviersitety — BDU (evakujavali hałoŭny korpus, jurfak, fizfak, fakultet mižnarodnych adnosin), BDATU, BDPU, BDMU, BDEU, Akademija kiravańnia, Instytut kiravańnia i pradprymalnictva.
«Niedzie ŭ 13.10 u aŭdytoryju zajšoŭ achoŭnik, skazaŭ, usim źbiracca i vychodzić, jość pahroza padryvu budynka. Paśla praz 10 chvilin padjechała mašyna milicyi, vyjšli supracoŭniki ŭ zvyčajnaj formie, za imi dvoje ŭ šlemach i broniekamizelkach», — apisvajuć situacyju na fizfaku BDU.
Kala fizfaka BDU
«Filijał Centra ekśpiertyz i vyprabavańniaŭ ŭ achovie zdaroŭja, jaki bazujecca ŭ łabaratornym korpusie mieduniviersiteta, pačali evakujavać a 14-j hadzinie. Pracoŭny dzień na siońnia skončany», — kažuć supracoŭniki.
«Byli i sapiory z sabakami, i MNS, i chutkija. Pierakryvali darohi. Nas vyvieli z karpusoŭ, a praz 20 chvilin skazali razychodzicca pa damach», — raspaviała studentka Viciebskaj vietakademii.
«U mianie dačka — studentka BDEU. Dazvaniłasia ŭ Zavodskaje RUUS, tam skazali, što na praciahu piaci chvilin atrymali paviedamleńni ab zakładzienych vybuchovych pryładach u 10 škołach», — piša čytačka.
Evakuacyja ŭ BDPU
«Evakuacyja prajšła žudasna. Pry realnym miniravańni usie b zahinuli ŭ taŭkučcy na leśvicach. Da apošniaha nie kažuć, iści ci nie dadomu. Nibyta navat płanujuć nazad zapuścić ludziej i dalej pravodzić zaniatki.
U adroźnieńni ad vučebnaj evakuacyi praces byŭ niearhanizavany, i ŭ vyniku na leśvicach (pažarnych u tym liku) byli zatory. U kalidorach nie było nikoha, chto nakiroŭvaŭ ludziej, i mnie, kab vyvieści hrupu z aŭdytoryi na vulicu, spatrebiłasia 15 chvilin. Nijakich siren — tolki moŭnaje paviedamleńnie», — narakaje vykładčyk z BDEU.
Kala Akademii kiravańnia
Evakuacyja była ŭ licei BDU, u niekalkich škołach Minska i Bresta, u Baranavičach. Mnohim baćkam, čyje dzieci ŭ sadkach, pišuć vychavacieli z prośbaj zabrać dziaciej.
«U 45-ju škołu Minska pryjšło paviedamleńnie. Padčas kancerta da Dnia nastaŭnika ŭsim skazali evakujavacca», — dzielacca baćki.
«U 38-j himnazii Minska starejšych dziaciej adpuścili raniej, małych skazali terminova zabrać. Pryjechała milicyja i «kasmanaŭty». Ci heta AMAP, ci achova, dzieci nie viedajuć. Dzieciam skazali pra vučebnuju tryvohu».
204-ja škoła Minska
Evakujavali taksama rabotnikaŭ zavoda «Intehrał», pastajalcaŭ hatela «Maryjot», akvapark «Frystajł».
U Kamianieckim rajvykankamie raskazali, što na poštu pryjšło paviedamleńnie nibyta ad Isłamskaj dziaržavy — pra toje, što siońnia pačniecca džychad (śviaščennaja vajna) suprać Biełarusi.
Evakuacyja vučniaŭ 60-j staličnaj škoły
Minuły raz masavaja rassyłka ab miniravańni była ŭ kancy maja. Paviedamleńni ab bombie atrymała 270 navučalnych ustanoŭ. Infarmacyja tady nie paćvierdziłasia. Nieviadoma, ci byli adšukanyja asoby, jakija arhanizavali rassyłku.
Hučnaja sprava była taksama ŭ suviazi z pasadkaj samalota Rynair — ułady paviedamlali, što listy ab miniravańni na poštu aeraportaŭ adpraviła paleścinskaj hrupiroŭka CHAMAS (jakaja paśla abvierhnuła svaju datyčnaść). Paźniej kazałasia, što paviedamleńni byli dasłany sa Šviejcaryi. Akazałasia, razmova była pra šviejcarski paštovy siervis Proton. Adpravicielaŭ listoŭ ab miniravańni nie znajšli.
