ZŠA dapamahali Ukrainie pry praviadzieńni apieracyi pa zatrymańni ŭ Biełarusi ŭ lipieni 2020 hoda 33 rasiejcaŭ, jakich Minsk nazvaŭ bajcami pryvatnaj vajennaj kampanii (PVK) Vahniera. Pra heta paviedamlaje CNN sa spasyłkaj na troch byłych vysokapastaŭlenych supracoŭnikaŭ ukrainskaj raźviedki.
Pavodle źviestak telekanała, Kijeŭ atrymaŭ ad Vašynhtona finansavańnie i techničnuju dapamohu. Akramia taho, CRU kansultavali ŭkrainski bok pa arhanizacyi apieracyi suprać «rasijskich najomnikaŭ».
U toj ža čas vysokapastaŭleny amierykanski čynoŭnik (jaho imia nie nazyvajecca) nazvaŭ hetyja śćviardžeńni nieadpaviednymi rečaisnaści. Pa słovach surazmoŭcy, raźviedka ZŠA viedała pra apieracyi, ale nie mieła da jaje dačynieńnie, piša RBK.
Krynica vykazała zdahadku, što zajavy byłych supracoŭnikaŭ ukrainskaj raźviedki mohuć być sprobaj źniać vinu z Kijeva za pravał apieracyi.
Ułady Ukrainy abvinavačvajuć hetych rasijanaŭ va ŭdziele ŭ bajavych dziejańniach na Danbasie. Eks-supracoŭniki ŭkrainskaj raźviedki paviedamili CNN, što arhanizavali apieracyju dla taho, kab «vymanić» «bajcoŭ PVK» z Rasii i padvierhnuć sudovamu pieraśledu.
Pa śćviardžeńni adnaho z surazmoŭcaŭ kanała, ukrainskija ahienty vydavali siabie za supracoŭnikaŭ pryvatnaj vajennaj kampanii.
Jany vierbavali nibyta rasijanaŭ dla achovy naftavych abjektaŭ u Vieniesuele, prapanoŭvajučy vyhadnyja kantrakty na $5 tys. u miesiac, na samaj spravie majučy namier pieradać ich Kijevu. Krynica CNN paviedamiła, što «na hetuju prynadu trapilisia sotni patencyjnych pretendentaŭ».
U vyniku supracoŭniki ŭkrainskaj raźviedki vybrali 28 rasijanaŭ, jak miarkujecca, źviazanych ź niezakonnymi apieracyjami va Ukrainie, i jašče piaciarych «bieź jakich-niebudź suviaziaŭ». Rasiejcam paviedamili, što jany nakirujucca ŭ Turcyju, a adtul — u Vieniesuełu. Z-za zakryćcia pavietranych miežaŭ rasijanie na aŭtobusie pryjechali ŭ Biełaruś i spynilisia ŭ sanatoryi «Biełarusačka» pad Minskam. Za niekalki hadzin da vyletu hrupu zatrymali supracoŭniki biełaruskaha KDB.
Jak śćviardžajuć byłyja supracoŭniki ŭkrainskaj raźviedki, dvoje z zatrymanych «prysutničali pry zapusku rakiety, jakaja źbiła MH17 (Boeing 777 «Małajzijskich avijalinij», jaki paciarpieŭ katastrofu na Danbasie ŭ 2014 hodzie; na borcie byli 283 pasažyry i 15 členaŭ ekipaža, jany zahinuli). Jašče čaćviora, pa śćviardžeńni surazmoŭcaŭ CNN, byli siabrami hrupy, adkaznaj za krušeńnie ŭkrainskaha vajskovaha samalota, u vyniku jakoha zahinuli nie mienš za 70 čałaviek.
Rasijanie, jakich biełaruski KDB nazvaŭ bajcami PVK Vahniera, byli zatrymanyja 29 lipienia 2020 hoda.
Minsk zavioŭ u dačynieńni da ich kryminalnyja spravy ab padrychtoŭcy terakta i masavych biesparadkaŭ. DziaržSMI pisali, što metaj była destabilizacyja abstanoŭki napiaredadni vybaraŭ prezidenta. Ukraina patrabavała vydać joj častku zatrymanych, pakolki padazravała ich u teraryźmie i ŭdziele ŭ kanflikcie ŭ Danbasie. Adnak Minsk paźniej źniaŭ z rasijanaŭ usie abvinavačvańni i pieradaŭ Maskvie.
Pra toje, što da apieracyi pa zatrymańni 33 rasiejcaŭ datyčnaja Ukraina, paviedamlali «Ukrainskaja praŭda» sa spasyłkaj na krynicy i hałoŭny redaktar partała «Cenzar.niet» Juryj Butusaŭ.
U Kijevie nazvali hetyja źviestki «dobra pradumanaj i spłanavanaj dezynfarmacyjnaj kampanijaj», adnak paźniej Słužba biaśpieki Ukrainy (SBU) pryznała, što źbirała dokaznuju bazu na rasijan. U červieni 2021 hoda prezident krainy Uładzimir Zialenski zajaviŭ, što apieracyju płanavali inšyja dziaržavy, a Ukrainu sprabavali ŭ jaje «ŭciahnuć».
