«Prajavaj pravavoha defołtu źjaŭlajecca jurydyčnaje šulerstva. Źjava heta nie novaja, ale ciapier jana dasiahnuła niebyvałaha roskvitu. Vyhladaje heta tak: jurysty biaruć niejkuju situacyju, pryvodziać realna isnyja normy, ale pry hetym nienaviaźliva padmianiajuć paniaćci — i chočuć, kab u śviadomaści niešta pieramknuła i ludzi pavieryli, što «pa zakonie» na samaj spravie tak, jak ekśpierty pišuć.
Niekalki prykładaŭ.
Tych, chto znachodziŭsia na Akreścina, prymušali padpisvać prakurorskaje papiaredžańnie ab tym, što paŭtorny vychad na mitynh — kryminalnaja adkaznaść. Na toje, kab vynieści i padpisać u dačynieńni da kožnaha z zatrymanych papiaredžańnie resursaŭ prakuratury čamuści ŭ tyja dni chapiła, na inšyja dziejańni — nie, ale heta inšaja historyja.
U papiaredžańni adznačana, što ŭ vypadku PAŬTORNAHA parušeńnia zakanadaŭstva ab masavych mierapryjemstvach asoba moža być pryciahnuta da adkaznaści pa art. 342 KK.
Skład złačynstva, paznačany ŭ art. 342 KK, nie ŭtrymlivaje prykmiety paŭtornaści. Jon vykładzieny tak: «Arhanizacyja hrupavych dziejańniaŭ, jakija hruba parušajuć hramadski paradak i spałučanyja ź vidavočnym niepadparadkavańniem zakonnym patrabavańniam pradstaŭnikoŭ ułady abo paciahnuli parušeńnie pracy transpartu, pradpryjemstvaŭ, ustanoŭ abo arhanizacyj, albo aktyŭny ŭdzieł u takich dziejańniach».
Lubyja takija dziejańni ciahnuć kryminalnuju adkaznaść.
Tamu papiaredžańnie prakuratury ab adkaznaści ŭ vypadku paŭtornaha ŭdziełu — ci to hrubaja jurydyčnaja pamyłka, ci to hroznaje papiaredžańnie, što administracyjny skład apryjory budzie transfarmavany ŭ kryminalny. U lubym razie ludzi, ich svajaki i siabry — vierać.
Pastupajuć źviestki, što ŭ niekatorych škołach i dziciačych sadkach baćkoŭ prosiać padpisać papiaredžańnie ab tym, što ŭdzieł u niesankcyjanavanych masavych mierapryjemstvach moža paciahnuć nastupstvy, praduhledžanyja dekretam №18 ad 24 listapada 2006 h. № 18 «Ab dadatkovych mierach pa dziaržaŭnaj abaronie dziaciej u niaščasnych siemjach».
Mnie b chaciełasia spadziavacca, što heta niapraŭda, ale schiema taja ž: realnaja norma i «naciahvańnie» jaje na nieadpaviednuju situacyju. Nahadaju, pavodle dekreta №18, dzieci padlahajuć dziaržaŭnaj abaronie i źmiaščeńniu na dziaržaŭnaje zabieśpiačeńnie ŭ vypadku, kali vyjaŭlena, što baćki viaduć AMARALNY ład žyćcia, što akazvaje škodnaje ŭździejańnie na dziaciej, źjaŭlajucca chraničnymi ałkaholikami ci narkamanami albo inšym čynam nienaležna vykonvajuć svaje abaviazki pa vychavańni i ŭtrymańni dziaciej, u suviazi z čym jany ZNACHODZIACCA ŭ sacyjalna niebiaśpiečnym stanoviščy.
Takim čynam, prava na ŭdzieł u mirnych akcyjach raptam pieratvarajecca nie tolki ŭ złačynstva, ale i ŭ paćviardžeńnie amaralnaści adnaho z baćkoŭ, što stvaraje pahrozu dla dziaciej. Heta za hrańniu. Heta całkam zasłuhoŭvaje niadaŭna sfarmulavanaha vinšavańnia «Z dniščam!».
Stvareńnie Kaardynacyjnaj rady adbyvałasia hałosna i publična. U rehłamiencie KR pakazana, što meta KR — «arhanizacyja pracesu pieraadoleńnia palityčnaha kryzisu i zabieśpiačeńnia zhody ŭ hramadstvie, a taksama dla abarony suvierenitetu i niezaležnaści Respubliki Biełaruś.
KR dziejničaje na padstavie asnoŭnych pryncypaŭ Kanstytucyi. KR nie stavić metaj zachop dziaržaŭnaj ułady niekanstytucyjnym šlacham, nie zaklikaje da arhanizacyi i padrychtoŭki dziejańniaŭ, jakija parušajuć hramadski paradak».
Aznajomiŭšysia z nazvanymi dakumientami, Hienieralnaja prakuratura daje kamientar na svaim sajcie: «Hrupaj hramadzian Respubliki Biełaruś 18 žniŭnia 2020 hoda zajaŭlena ab stvareńni Kaardynacyjnaj rady, metami jakoj u tym liku źjaŭlajecca arhanizacyja pieradačy ŭłady. Płanujecca stvaryć palityčny orhan, jaki pavinien uziać na siabie praces pieradačy ŭłady ad dziejnaha kiraŭnika dziaržavy… Stvareńnie i dziejnaść padobnaj rady nakiravana na zachop dziaržaŭnaj ułady, a taksama pryčynieńnie škody nacyjanalnaj biaśpiecy Respubliki Biełaruś».
Zatym Hienieralnaja prakuratura zavodzić spravu pa art. 361 KK RB, pa jakim ciapier užo dapytanyja amal usie členy prezidyuma, dapytvajucca členy asnoŭnaha składu rady, i chutka nastupić čarha členaŭ pašyranaha składu (bolš za 4000 čałaviek).
Sapraŭdy, zakliki da hvałtoŭnaha źviaržeńnia zakonnaj ułady — artykuł 361 KK. Ale zychodziačy z usich źviestak ab dziejnaści KR —znoŭ padmiena paniaćciaŭ i vidavočny cisk.
Pavažanyja kalehi-jurysty. Ja razumieju, što moj zaklik prahučyć naiŭna, ale davajcie nie budziem zajmacca jurydyčnym šulerstvam. Heta ž zabivaje ŭsiu pravavuju sistemu.
Navošta patrebnyja jurysty, kali jany sami robiać niemahčymym i niemetazhodnym svajo isnavańnie?
Ja nie mahu ŭjavić muzykanta, jaki śviadoma razładzić hitaru, kab kožnaja nota hučała bieznadziejna falšyva.
Ja nie mahu ŭjavić architektara, jaki pahodzicca pakalečyć padmurak budynka, a potym budzie spadziavacca niešta na im pabudavać.
I ja da hetaha času nie mahu zrazumieć, jak va ŭmovach taho, što adbyvajecca, možna prosta maŭčać. A ŭžo tym bolš jak možna śviadoma skažać paniaćci i zajmacca prapahandaj pad prykryćciom pravavych normaŭ».
Nahadajem, prysud Maryi Kaleśnikavaj i Maksimu Znaku budzie abvieščany 6 vieraśnia a 12.00 u budynku suda Minskaha rajona. Pa zakonie, abviaščeńnie prysudu pavinna być publičnym.
