Pavodle rašeńnia Viarchoŭnaha suda, usie dovady pradstaŭnika HA «BAŽ» ab tym, što hety pazoŭ nie musić być zadavoleny, pryznać niavažnymi, a pradstaŭnik adkazčyka «niapravilna razumieje zakon».
Nahadajem chranałohiju padziej:
9 červienia Ministerstva justycyi pačało maštabnuju pravierku dziejnaści HA «BAŽ».
14 lipienia ŭ ofisie BAŽ biez prysutnaści pradstaŭnikoŭ arhanizacyi siłaviki praviali čarhovy vobšuk, paśla jakoha ofis byŭ apiačatany i dostup u jaho błakavany. Kopii pratakołaŭ vobšuku nam nie ŭručalisia. Pieralik adabranaj majomaści nam nie viadomy. Taksama ŭ hety dzień byli zabłakavanyja apieracyi na bankaŭskim rachunku arhanizacyi.
15 lipienia, na nastupny dzień paśla vobšuku i błakavańnia ofisa, asacyjacyja atrymała ad Ministerstva justycyi kopiju zahadu ab vyniasieńni nam piśmovaha papiaredžańnia.
21 lipienia Ministerstva justycyi paviedamiła ŭ sacyjalnych sietkach ab tym, što ŭžo nakiravała ŭ Viarchoŭny sud Biełarusi pazoŭ ab likvidacyi HA «Biełaruskaja asacyjacyja žurnalistaŭ».
«BAŽ — heta nie zapis u rejestry jurydyčnych asob. Heta amal paŭtary tysiačy siabraŭ arhanizacyi, abjadnanych uśviedamleńniem svajoj misii: pašyrać prastoru svabody słova ŭ Biełarusi. Prabačcie za pafas i cytatu z Stratehii BAŽ.
Heta — siabry i kalehi. Heta — MY, a nie jurydyčny status i ofis. I MY budziem praciahvać rabić svaju spravu, niezaležna ad rašeńnia sudoŭ i administracyjnych orhanaŭ, — usimi zakonnymi sposabami», — havoryć staršynia HA «BAŽ» Andrej Bastuniec.
HA «BAŽ» dziejničaje z vosieni 1995 hoda. Abjadnoŭvaje bolš za 1300 siabraŭ — rabotnikaŭ miedyjaśfiery. HA «BAŽ» — heta ŭpłyvovaja i pryznanaja mižnarodnaj prafiesijnaj supolnaściu arhanizacyja.
