Na sudzie Łarysa Tankaškur pryznała vinu, patłumačyła svoj učynak abureńniem dziejańniami pravaachoŭnikaŭ, jakija źbivali pratestoŭcaŭ. Akramia aryštu, sud nakłaŭ na Łarysu Tankaškur vialikaje hrašovaje spahnańnie.
U červieni žančynu źmiaścili spačatku na Vaładarskaha, a ŭ lipieni pieraviali ŭ Baranavicki aryštancki dom. Tolki praz tydzień svajaki atrymali ad Łarysy pieršy list. Ciapier listavańnie «bolš-mienš» rehularnaje.
«Vybiraješ duš albo prahułku»
«Siadžu ŭ kamiery na 8 čałaviek, ale ludziej tudy-siudy pieravodziać, tamu byvaje pa-roznamu. Ciapier nas 6, dziaŭčatki ŭsie dobryja. Starejšaj 67 hadoŭ, samaj małodšaj — 32. Jakaja tut ježa, sama viedaješ. Siońnia chadzili ŭ duš, vybiraješ duš albo prahułku. My vybrali duš», — napisała Łarysa ŭ adnym ź pieršych listoŭ.
Ź listavańniem, pavodle paštarki Łarysy Tankaškur, u jaje rehularnyja prablemy. Častka listoŭ, jakija joj pišuć svajaki i nieabyjakavyja ludzi, da jaje nie dachodzić.
«Napisała, što atrymała ad mianie tolki adzin list, choć ja adpraviła ŭžo niekalki. I jašče zhadała adnu žančynu, jakaja dasłała joj list, a sama Łarysa asabista jaje nia viedaje. Dyk toj list joj tak i nie pieradali, dali tolki pusty kanvert z proźviščam. Łarysa ličyć, što tam byli niejkija słovy padtrymki, a heta ciapier zabaroniena», — miarkuje svajačka Łarysy Tankaškur.
Nad łožkam paviesili tabličku «schilnaja da ekstremizmu»
Pra pobytavyja ŭmovy Łarysy ŭ Baranavickim aryštanckim domie svajakam viadoma mała.
«Napisała tolki, što ŭ kamiery dušna, i padsumavała, što «na Vaładarcy było lepš». Atrymała hrošy na atavarku, na jakija kupiła ŭ turemnaj kramie pierniki i cukierak. Niadaŭna paprasiła dasłać joj ciopłuju koftu, bo pradbačyć, što ŭ vieraśni stanie choładna. Prosić padpisać jaje na «Žanočuju hazetu», bo niama čaho čytać. Krasvordy, jakija ŭ jaje byli, daŭno ŭsie razhadali, bavić čas niama čym. Napisała, što niejak vadzili hladzieć pa televizii «Kontury» — vidać, mazhi im tam pramyvajuć z dapamohaj dziaržaŭnaj prapahandy», — paviedamiła svajačka Łarysy Tankaškur.
Pavodle źviestak ad Łarysy, pa prybyćci ŭ Baranavičy jaje adrazu pastavili na ŭlik jak schilnuju da ekstremizmu. Ale ŭ čym heta vyjaŭlajecca, svajaki mohuć tolki zdahadvacca.
«Napisała, što nad jaje łožkam paviesili tabličku «schilnaja da ekstremizmu». Heta nas aburaje, jakaja ź jaje «ekstremistka», ale što zrobiš. Moža, praviarajuć dadatkova, ci što? Zrazumieła, jość peŭnyja abmiežavańni i asablivaści, ale paviedamić pra ich u listach prosta nie moža. Tolki dadała, što jašče hod paśla vychadu na volu joj pryjdziecca adznačacca ŭ milicyi», — raskazała svajačka Łarysy Tankaškur.
Łarysa zvyčajna piša, što ŭ jaje «ŭsio dobra», ale svajaki ličać, što praŭda inšaja. Pavodle svajakoŭ Łarysy, u peŭnych situacyjach jana ŭžyvaje «ezopavu movu», kab paviedamić pra realny stan rečaŭ.
«Kali piša, što joj pryśniłasia maci, my dakładna možam ličyć, što ź joj niešta drennaje. Ale raskazać pra heta jana zmoža, tolki jak vyjdzie na volu», — miarkuje svajačka paštarki.
