Valancinu 48 hadoŭ, jon minčuk. Cikava, što nazvali chłopčyka ŭ honar babuli pa matčynaj linii Valanciny Sucharžeŭskaj. Mama Stefanoviča Antanina taksama naradziłasia ŭ Minsku, ale pachodzić ź Sibiry. U jaje jarkaja azijackaja źniešnaść, praź jakuju ź jaje nieadnarazova naśmichalisia: «Jedź u Kitaj da svajho baćki Mao Czeduna». Mabyć, tamu Valancin ź dziacinstva ŭžo nie ciarpieŭ nijakich prajavaŭ rasizmu. Peŭnaja «azijackaść» u źniešnaści pieradałasia i jamu.
Baćka Kastuś rodam z haradka Hłusk na Mahiloŭščynie. Para pabrałasia, kali jamu było 19 hadoŭ, joj — 18. Litaralna praz hod užo naradziŭsia Valik. Baćki vučylisia ŭ Minskim architekturnym technikumie. Paśla baćka staŭ-budaŭnikom praktykam, abjeździŭ amal uvieś SSSR, a mama pracavała inžynieram u «Biełpropprajekcie».
Spačatku siamja žyła na Partyzanskim praśpiekcie, a potym na vulicy Asanalijeva. U dziacinstvie chłopčyk maryŭ stać laśničym, marakom, a taksama mašynistam ciahnika. Valancin havaryŭ, što kaniec 1980-ch najbolš paŭpłyvaŭ na jahonuju śviadomaść.
«Pierabudova, razbureńnie kamunistyčnaj ideałahičnaj sistemy. My, tahačasnyja padletki, dosyć cynična stavilisia da taho, što tyčyłasia ŭsiaho savieckaha, bo nie vieryli bolš u kamunistyčnyja dohmy i adkryta ździekavalisia z savieckich «śviatyń», — kazaŭ jon.
Chłopiec słuchaŭ «Kino», DDT, «Alisu». Śviadoma admoviŭsia ŭstupać u kamsamoł. Ciažka pavieryć, ale ŭ toj čas Stefanovič chadziŭ z doŭhimi vałasami.
Tak Stefanovič vyhladaŭ u vojsku
Valancin adsłužyŭ u vojsku: zabirali jaho jašče ŭ SSSR, a viartaŭsia sa słužby ŭ Biełarusi. Słužyŭ u Lidzie. Baćki chacieli, kab Valik staŭ taksama inžynieram, ale chłopiec byŭ čystym humanitaryjem, tamu vyrašyŭ pastupać na jurysta ŭ Instytut mižnarodnych pracoŭnych adnosin. VNU Valancin skončyŭ z čyrvonym dypłomam. U Stefanoviča była mara stać advakatam, ale realizavać jaje nie atrymałasia. U čas vučoby jon prachodziŭ praktyku ŭ orhanach prakuratury, ale kančatkovaje rašeńnie nie iści na dziaržaŭnuju słužbu pryniaŭ paśla refierenduma 1995 hoda.
Valancin prajšoŭ praz škołu «Maładoha frontu», dzie sustreŭ svaju žonku Alinu. Jana vypusknica Linhvistyčnaha ŭniviersiteta, pracuje pierakładčycaj, u pary troje dziaciej.
Razam ź siamjoj.
Za ŭdzieł u akcyjach pratestu ŭ 1997 hodzie atrymaŭ pieršy administracyjny aryšt — 5 sutak. Na toj čas Valancin pracavaŭ juryskonsultam na Minskim padšypnikavym zavodzie, a potym pa prapanovie Alesia Bialackaha dałučyŭsia da «Viasny».
«Valik, ty juryst, tamu pavinien dapamahać ludziam, a nie pracirać štany ŭ kabiniecie na zavodzie», — skazaŭ tady Bialacki. Voś užo 23 hady z taho času Stefanovič — heta nieadjemnaja častka «Viasny».
Daviałosia papracavać u hramadskaj pryjomnaj «Viasny». «Prymali ludziej z roznymi prablemami, dapamahali pisać skarhi, vystupali na pracesach jak hramadskija abaroncy (tady heta dazvalałasia zakonam). Pamiataju, vystupali abaroncami navat u kryminalnych pracesach. Naprykład, dapamahli apraŭdać Uładzimira Pleščanku, jakoha abvinavačvali ŭ tym, što jon u Viciebsku skraŭ biust Suvorava», — kazaŭ Valancin.
U toj ža čas pačaŭ pracavać ź ludźmi, jakich prysudžvali da śmiarotnaha pakarańnia, mieŭ šmat listoŭ ad asudžanych. U 90-ja za hod rasstrelvali kala 40 čałaviek, tema była aktualnaj nadzvyčaj. Valancin Stefanovič — rašučy praciŭnik śmiarotnaha pakarańnia.
Faktyčna Stefanovič uziaŭ na siabie kiraŭnictva «Viasnoj» u toj momant, kali za kratami ŭ 2011 hodzie apynuŭsia Aleś Bialacki. U 2012 hodzie Valancin trapiŭ u «čornyja śpisy» tych, kaho nie vypuskali za miažu, nibyta praz prablemy z vojskam, chacia tam jon adsłužyŭ 20 hadoŭ nazad.
«Heta tolki zvonku zdajecca, što my zaŭsiody spakojnyja i narmalna na ŭsio reahujem. Nasamreč heta nie tak», — kazaŭ pra psichałahičny ciažar svajoj pracy Stefanovič.
Apošnimi miesiacami pracy ŭ pravaabaroncaŭ było vielmi šmat — heta była rabota non-stopam. U sakaviku Valancin paraŭnaŭ abjom represij u sučasnaj Biełarusi z stalinskim časam. Tym nie mienš, u kožnym intervju jon kazaŭ, što nikoli nie škadavaŭ pra svoj vybar.
Zaraz pravaabaronca znachodzicca ŭ izalatary na Akreścina, za kratami i inšyja viasnoŭcy: Uładzimir Łabkovič i jaho žonka Nina, Aleś Bialacki, Alena Łapcionak, Andrej Pałuda, Jaŭhienija Babajeva.
