Tyja, chto byŭ asudžany albo abvinavačany pa «palityčnych artykułach», pavinny vyjści na svabodu i być amnistavanyja na praciahu dvuch sutak. Havorka idzie pra kryminalnyja spravy, zaviedzienyja paśla 8 maja 2020 hoda.
U dakumiencie pieraličvajucca artykuły Kryminalnaha kodeksa, jakija buduć adnaznačna ličycca palityčnymi. Heta 130 «Raspalvańnie varožaści»; 293 «Masavyja biesparadki»; 342 «Arhanizacyja i padrychtoŭka dziejańniaŭ, što hruba parušajuć hramadski paradak, abo aktyŭny ŭdzieł u ich»; 356 «Zdrada dziaržavie»; 357 «Zmova», 364 «Hvałt u dačynieńni da supracoŭnika orhanaŭ unutranych spraŭ», a taksama roznyja «paklopy» i «abrazy».
Zikracki adznačaje, što pa hetych artykułach asudžana našmat bolš ludziej, čym uklučana ŭ śpis palitviaźniaŭ «Viasny».
Asobna havorka viadziecca pra tych, na kaho zaviali kryminalnuju spravu pa artykułach, jakija nie źjaŭlajucca palityčnymi, ale časam vykarystoŭvajucca, kab pasadzić niazhodnych. Majecca na ŭvazie niavypłata padatkaŭ, karupcyja, admyvańnie srodkaŭ abo atrymańnie chabaraŭ.
Tyja, suprać kaho raspačatyja takija spravy z 8 maja 2020 hoda, taksama vyjduć na svabodu na praciahu dvuch dzion, ale pad padpisku ab niavyjeździe. Ich spravy buduć pierahladacca. U hetuju hrupu traplajuć i Viktar Babaryka, i fihuranty spravy Tutbaja, u tym liku Maryna Zołatava.
Narešcie, tyja, chto atrymaŭ administracyjnuju adkaznaść pa «palityčnych» artykułach nakštałt artykuła 23.34 (taksama z 8 maja 2020 hoda), buduć nieadkładna vyzvalenyja. Sumy štrafaŭ, vypłačanyja pa hetych spravach, buduć viernutyja ź biudžetu.
Usie zvolnienyja pa palityčnych matyvach atrymajuć mahčymaść adnavicca na pracy.
