Fota: pressball.by
Za savieckimi časami biełarusy pryzvyčalisia hladzieć «pieršuju knopku» — ahulnasajuznaje telebačańnie. Paśla abviaščeńnia niezaležnaści situacyja nie nadta źmianiłasia. Rasijskaje ORT dy NTV hladzieli ŭ kožnaj siamji i časam raźbiralisia ŭ palitycy susiedziaŭ nie horš, a navat lepš, čym u biełaruskaj.
Hetamu spryjali i nadta libieralnaje razumieńnie aŭtarskaha prava.
Usie 1990-ja biełarusy hladzieli futboł na rasijskich kanałach i słuchali rasijskich kamientataraŭ.
Tak było i z čempijanatam śvietu — 1998 i čempijanatam Jeŭropy — 2000. Tamu Biełteleradyjokampanija nie nabyvała pravy na pakaz čempijanatu śvietu 2002 hoda, jaki musiŭ prachodzić u Japonii dy Paŭdniovaj Karei.
Čempijanat pačynaŭsia 31 maja. Ale roŭna za tydzień, 24 maja, ORT aficyjna paviedamiła Ministerstvu infarmacyi Biełarusi, što pravy na pakaz čempijanatu abmiežavanyja terytoryjaj Rasii.
Takoje rašeńnie pryniaŭ pravaŭładalnik — niamieckaja kampanija KirchMedia. Darečy, jano zakranuła nie tolki Biełaruś. Futboł nie zmahła ŭbačyć i Abchazija.
Pryčyna była ŭ niedachopie hrošaj. Niezdarma ŭ vieraśni taho ž hoda hetaja kampanija abjaviła pra bankructva.
Pačalisia pieramovy, ale apieratyŭna zakupić pravy nie atrymałasia. Miž tym pačatak čempijanatu śvietu nabližaŭsia. U vyniku BT nie pakazała cyrymoniju adkryćcia — zamiest jaje pastavili staryja naviny i adzin ź filmaŭ. Ale potym u efiry źjaviłasia karcinka matča adkryćcia pamiž Francyjaj i Sieniehałam.
Praŭda, biełarusy prosta ŭziali tranślacyju telekanała NTV+, zamazaŭšy łahatypy.
Jak raskazali «Našaj Nivie» tahačasnyja supracoŭniki BT,
takoje rašeńnie prymałasia na ŭzroŭni staršyni Biełteleradyjokampanii. Tady jaje ŭznačalvaŭ Jahor Rybakoŭ.
Vybuchnuŭ skandał. Kanał NTV abvinavaciŭ biełarusaŭ u kradziažy i abiacaŭ padać u sud. Praŭda, da jaho nie dajšło.
«Daviałosia razrulvać situacyju na vysokim uzroŭni», — zhadvajuć supracoŭniki BT. Praŭda, pa ich źviestkach, kiraŭnictva BT na vyšejšym uzroŭni navat pachvalili za znojdzienaje rašeńnie.
U vyniku biełarusy zastalisia biez futboła. Internet tady byŭ u zarodkavym stanie, spadarožnikavyja talerki mieli adzinki.
Fota: pressball.by
Biełarusy ratavalisia ŭ adzinkavych spartyŭnych barach, dzie išoŭ NTV+ — i vychodzili na akcyi pratestu.
3 červienia 2002 hoda kala trochsot čałaviek vyjšli ŭ Minsku da pomnika Jakubu Kołasu. Jany trymali ŭ rukach płakaty «Dzie naš futboł?», «ORT i RTR — aŭtahoł, BT — hańba», «Śviet hladzić futboł, a my?».
Na mitynhu prapanoŭvali adkryć u banku raźlikovy rachunak, a potym pieradać hrošy kiraŭnikam BT, kab tyja ŭrehulavali prablemu. Darečy, u mitynhu brali ŭdzieł i pradstaŭniki apazicyi. Jak tady žartavali ŭ ŚMI, heta było ci nie adzinaje mierapryjemstva ź ich udziełam, jakoje nichto nie razahnaŭ.
Urešcie pieramovy skončylisia paśpiachova. Tranślacyi pačalisia pasiarod hrupavoha raŭnda. Jak pisali ŚMI, košt pytańnia skłaŭ kala paŭmiljona dalaraŭ.
Darečy, KirchMedia vystaviła patrabavańnie, kab kamientatary pracavali pa-biełarusku. BT zhadziłasia, i heta byŭ ci nie adziny bujny futbolny čempijanat, jaki hučaŭ na rodnaj movie.
