Siońnia Maryju Kaleśnikavu zdymała zdymačnaja hrupa dziaržaŭnaha telebačańnia.
Maryja na heta zhody nie davała, paviedamlaje telehram-kanał Babaryki.
Nahadajem, Maryja Alaksandraŭna Kaleśnikava rodam ź Minska. Pa jaje ŭłasnych raskazach, jaje baćka Alaksandr Kaleśnikaŭ słužyŭ na padvodnaj łodcy i vykładaŭ u avijacyjnym kaledžy. Maci — taksama inžynier.
U 2007 hodzie Maryja Kaleśnikava pierajechała ŭ Hiermaniju. Spačatku vučyłasia ŭ Vyšejšaj škole muzyki ŭ Štutharcie, a paśla brała ŭdzieł u kancertach, zajmałasia arhanizacyjaj mižnarodnych kulturnych prajektaŭ jak tam, tak i ŭ rodnaj krainie. Šmat padarožničała — cikaviłasia kulturnymi vystavami i fiestyvalami ŭ Italii, Polščy i Litvie. Žyvučy ŭ Hiermanii, Maryja kožny dzień telefanavała siamji.
U 2017 hodzie Biełhazprambank, staršynioj praŭleńnia jakoha byŭ viadomy ŭ krainie bankir Viktar Babaryka, kupiŭ try pustych cecha Minskaha stankabudaŭničaha zavoda. Byłyja zavadskija pamiaškańni pieraabstalavali ŭ kulturny chab — Ok16. Jak tady kazali, heta miesca pavinna było stać inkubataram kulturnych prajektaŭ i ekanamičnych instrumientaŭ budučyni. Art-dyrektaram prajekta stała Maryja Kaleśnikava.
Tady Kaleśnikava kazała, što meta takich prajektaŭ — pryciahvać ludziej, nieabyjakavych da mastactva, da abmierkavańnia sacyjalnych prablem, farmiravać zvyčku naviedvać kulturnyja mierapryjemstvy i žadańnie marnavać hrošy na mastactva i ŭražańni ad jaho.
Mienavita dziakujučy hetamu prajektu bankir Viktar Babaryka paznajomiŭsia z Maryjaj Kaleśnikavaj. 12 maja Babaryka vysunuŭ svaju kandydaturu dla ŭdziełu ŭ vybarach prezidenta. I mienavita tady ž Maryja Kaleśnikava vyrašyła, što taksama padtrymaje Babaryka.
Maryja źnikła 7 vieraśnia ŭ Minsku razam ź jašče dvuma siabrami Kaardynacyjnaj rady, Antonam Radniankovym i Ivanam Kraŭcovym. Jana śćviardžaje, što jaje siłaj pryvieźli na biełaruska-ŭkrainskuju miažu dla vydvareńnia z krainy. Adnak jana parvała svoj pašpart na pamiežnym pierachodzie i vyskačyła z aŭtamabila praz akno.
9 vieraśnia stała viadoma, što žančyna zatrymanaja i padazrajecca ŭ kryminalnym złačynstvie pa č. 3 art. 361 Kryminalnaha kodeksa (zakliki da dziejańniaŭ, nakiravanych na pryčynieńnie škody nacyjanalnaj biaśpiecy Respubliki Biełaruś).
12 vieraśnia stała viadoma, što Maryju Kaleśnikavu pieraviali ŭ SIZA h. Žodzina.
21 śniežnia stała viadoma, što na daručeńnie Hienprakuratury Śledčy kamitet raspačaŭ kryminalnuju spravu ab zmovie z metaj zachopu ŭłady niekanstytucyjnym šlacham (častka 1 artykuła 357 KK) suprać členaŭ Kaardynacyjnaha savieta. Taksama Maryja Kaleśnikava stała fihurantkaj kryminalnaj spravy ab stvareńni ekstremisckaha farmiravańnia (artykuł 361-1 KK), taksama ŭzbudžanaj suprać Kaardynacyjnaj rady.
Nočču 8 studzienia Maryju pieraviali ŭ SIZA-1 u Minsk.
11 lutaha stała viadoma, što Maksimu Znaku i Maryi Kaleśnikavaj vystavili novyja abvinavačvańni: zmova z metaj zachopu dziaržaŭnaj ułady niekanstytucyjnym šlacham (č. 1 art. 357 KK), stvareńnie ekstremisckaha farmiravańnia i kiraŭnictvie im (č.1 art. 361-1 KK).
