«Jon byŭ špitalizavany ŭ chirurhičnaje adździaleńnie MNPC chirurhii, transpłantałohii i hiematałohii. Pacyjent pastupiŭ pa ekstrannych pakazańniach u 15:30. Pry pastupleńni byli vykanany ŭsie nieabchodnyja miedycynskija mierapryjemstvy, była praviedziena apracoŭka rany. Na dadzieny momant stan pacyjenta stabilny, situacyj, što pahražajuć žyćciu, niama. Pacyjent aprytomnieŭ paśla narkozu», — paviedamlajuć u Ministerstvie achovy zdaroŭja.
Nahadajem, Ściapan Łatypaŭ staŭ na łaŭku i ŭvatknuŭ ručku ŭ horła. Pierad hetym jon skazaŭ: «HUBAZ paabiacaŭ, kali ja nie pryznaju vinu, buduć kryminalnyja spravy suprać rodnych i susiedziaŭ».
1 červienia sud Savieckaha rajona Minska pačaŭ razhlad spravy žychara Płoščy Pieramien Ściapana Łatypava. Jaho zatrymali jašče ŭ vieraśni 2020 hoda — jon nie davaŭ zamalavać viadomy murał z dydžejami. Z taho času Łatypaŭ za kratami, u jaho ceły šerah abvinavačańniaŭ: machlarstva, niepadparadkavańnie milicyi, masavyja biesparadki… Jamu pahražaje da 10 hadoŭ.
Spačatku ŭ sudzie začytali abvinavačańnie i vysłuchali paciarpiełych (milicyjantaŭ, jakija letaś zatrymlivali Ściapana). Sam Łatypaŭ vinu nie pryznaŭ.
Zatym sudździa Voŭk abjaviŭ pierapynak na abied. I amal adrazu paśla pierapynku Ściapan ździejśniŭ sprobu suicydu.
Prysutnyja na sudzie raspaviali «Našaj Nivie», što paśla abiedu vyklikali śviedkam baćku Ściapana, jon daŭ pakazańni.
Sudździa spytaŭ: «Ci jość pytańni ŭ abvinavačanaha?»
I Ściapan skazaŭ: «Baćka, paśla spatkańnia [z taboj] da mianie pryjšoŭ HUBAZ, paabiacaŭ, što kali ja nie pryznaju vinu, u mianie budzie pres-chata, kryminalnyja spravy suprać rodnych i susiedziaŭ».
«Pres-chata ŭ mianie była — 51 dzień, — skazaŭ Ściapan baćku. — Tak što ty rychtujsia».
I potym pačaŭ rezać sabie horła.
«U Ściapana była z saboj papka z dakumientami. Jon dastaŭ ź jaje niejki pradmiet, mahčyma, ručku. Zalez na łaŭku, upiorsia nahami ŭ kraty i ŭvatknuŭ sabie štości ŭ horła ci pačaŭ jaho rezać. Potym upaŭ, staŭ rezać ruki», — raskazvajuć śviedki.
Adrazu kletku nie zmahli adamknuć, bo ŭ kanvairaŭ nie było klučoŭ. Jany byli ŭ kahości za dźviaryma.
Pakul adamknuli kletku, Ściapan užo vyhladaŭ nieprytomnym.
Pryjechała chutkaja. Łatypava špitalizavali.
«Maralna padtrymlivaŭ niavyznačanych asob». Pačaŭsia sud nad Ściapanam Łatypavym z Płoščy Pieramien
21 maja ŭ škłoŭskaj kałonii paviedamili ab śmierci 50-hadovaha Vitolda Ašurka, palitźniavolenaha ź Lidskaha rajona. Paźniej Śledčy kamitet apublikavaŭ narezku ź videazapisaŭ z kamiery Ašurka i paviedamiŭ, što viazień dvojčy ŭpaŭ, paśla čaho pamior. Ź videa mała što možna zrazumieć ab pryčynach padzieńniaŭ, ale ŚMI zrabili vysnovu, što viazień znachodziŭsia ŭ ŠIZA, a na zapiaściach u jaho — niezrazumiełyja čornyja pałoski.
Čytajcie taksama:
Susiedzi zatrymanaha Ściapana Łatypava z «płoščy Pieramien» zapisali VIDEAzvarot
Siadzieŭ na «Šanchai», byŭ u Navinkach, pierachvareŭ na kavid. Što viadoma pra palitviaźnia z płoščy Pieramien Ściapana Łatypava
Karajeŭ pra palitviaźnia Łatypava: Jon płanavaŭ raźviejać jadachimikaty na bajavyja paradki AMAPa
Žychara Płoščy Pieramien Łatypava bolš nie abvinavačvajuć u tym, što chacieŭ «atrucić siłavikoŭ»
