Onliner.by
Sudździa Anžeła Kaściukievič ahučyła nastupnyja prysudy: Kiryłu Kazieju — 7 hadoŭ kałonii ŭzmocnienaha režymu, Juryju Siarhieju — 6 hadoŭ kałonii ŭzmocnienaha režymu. Napiaredadni prakuror zaprasiła mienavita takoje pakarańnie. Taksama abvinavačanyja musiać spłacić pa 150 bazavych vieličyń štrafu.
Nahadajem, 27 kastryčnika 2020 hoda ŭ sacsietkach źjaviłasia videa, jak u Čyžoŭcy kiroŭca BMW bje mužčynu prosta na darozie. Da hetaha mužčyna machaŭ bieł-čyrvona-biełym ściaham, i takuju reakcyju kiroŭcy mnohija źviazali ź jaho palityčnaj pazicyjaj (paźniej napadnik patłumačyć, što incydent nie źviazany z palitykaj). Videa bojki razyšłosia ŭ sacsietkach i telehram-kanałach, tam ža źjaviŭsia adras i numar telefona kiroŭcy — Dźmitryja Davydziuka.
I, pa viersii śledstva, u adnym z čataŭ troje žycharoŭ Minska vyrašyli pravučyć mužčynu: prakałoć šyny jaho aŭto. Nočču 28 kastryčnika jany pryjechali da jaho ŭ dvor, ale na padychodzie dvoje (Kaziej i Siarhiej) byli zatrymanyja bajcami AMAP, jašče adzin udzielnik paśpieŭ schavacca i ciapier znachodzicca ŭ vyšuku.
Pry asabistym vobšuku ŭ Kazieja byŭ kanfiskavany pnieŭmatyčny pistalet biez kul i bałona, u Siarhieja — samarobny nož, jaki ekśpiertyza pryznała chałodnaj zbrojaj. A na nastupny dzień pry ahladzie aŭtamabila Kazieja byli vyjaŭlenyja ściahi, ulotki, fiejervierki, łaziernyja ŭkazki, ručnaja hranata i 58 patronaŭ. Ahlad mašyny byŭ pakazany ŭ siužecie na dziaržTB.
Spačatku mužčyn asudzili na aryšt pavodle administracyjnych artykułaŭ, ale paśla zakančeńnia aryštu ich pakinuli pad vartaj, a zatym pradjavili abvinavačvańnie pa troch kryminalnych artykułach. Abodva abvinavačanyja nie pryznajuć svajoj viny.
Na pieršym pasiadžeńni adbyŭsia dopyt kiroŭcy BMW Davydziuka, pryznanaha pa spravie paciarpiełym. Jon skazaŭ, što Kazieja i Siarhieja jon bačyć upieršyniu, a infarmacyi ab tym, što mienavita abvinavačanyja adpraŭlali jamu paviedamleńni z pahrozami, u sudzie nie prahučała. Byli taksama dapytanyja ŭ zakrytym režymie supracoŭniki AMAP, jakija ŭdzielničali ŭ zatrymańni.
Juryj Siarhiej ad dačy pakazańniaŭ na sudzie admoviŭsia. Kirył Kaziej ža raspavioŭ padrabiazna pra zatrymańnie, pra hvałt, jaki čynili amapaŭcy ŭ hety momant i padčas pajezdki ŭ RUUS, a taksama pra pahrozy i ździeki ŭ RUUS z boku milicyjantaŭ. Kaziej kateharyčna admaŭlaŭ, što pistalet, hranata i patrony naležać jamu. Jon ŭpeŭnieny, što ich padkinuli. Usie chadajnictvy ab praviadzieńni dadatkovych ekśpiertyz sudom byli adchileny.
