Kvatera Taćciany Zahorac znachodzicca na vośmym paviersie ŭ adnym z damoŭ u Novaj Baravoj. U RUUSie Taćcianu Zahorac abvinavacili ŭ «niesankcyjanavanym pikietavańni» i na jaje skłali pratakoł pa art. 24.23 KaAP, paviedamlajuć pravaabaroncy.
Sama Taćciana śćviardžaje, što ŭ hety čas jaje nie było ŭ kvatery.
Sudździa Minskaha rajona Novikava pacikaviłasia, čamu ŭ takim vypadku mienavita na jaje skłali pratakoł. Žančyna vykazała zdahadku, što cikavaść jana vyklikała z-za taho, što raniej atrymlivała papiaredžańnie ad milicyi z-za śniažynak na aknie.
Śviedka-milicyjant u svaim raparcie ŭkazaŭ try kvatery, z voknaŭ jakich vykrykvalisia łozunhi, ale vokny hetych troch kvater vychodziać na roznyja baki doma, tamu adnačasova ich vyznačyć niemahčyma, dakazvała žančyna.
Sudździa Novikava da słoŭ mamy traich niepaŭnaletnich dziaciej nie prysłuchałasia i aštrafavała jaje na 870 rubloŭ (30 bazavych). Prykładna stolki składaje siaredniemiesiačny zarobak čystymi ŭ Minskim rajonie.
Pres-słužba Ministerstva ŭnutranych spraŭ apisała situacyju tak:
«Iz okon v «Novoj Borovoj» žienŝiny vykrikivali łozunhi. Na nich sostavili protokoły.
Milicioniery ustanovili, čto k narušieniju poriadka proviedienija massovych mieroprijatij pričastny dvie 33-letnije žitielnicy domov na ulicach Leonardo da Vinči i Aviacionnoj.
Tam žie pravoochranitieli vyčiślili i 34-letnieho minčanina, kotoryj 17 marta na fłahštokie mieždu dvumia domami po ulicie Amielii Erchart poviesił bčb-fłah. Na mužčinu sostavlen anałohičnyj protokoł».
Viečarovyja pieraklički ŭ mikrarajonach vyhladajuć voś tak:
U Novaj Baravoj situacyja asablivaja. Tam ciapier praktyčna ŭvieś čas dziažurać patruli ŭ formie i biez formy. Šmat razoŭ za minułyja paŭhoda tam adbyvalisia zatrymańni, supolnaje praviadzieńnie času ŭ dvary stała praktyčna niemahčymaje. Na dachach budynkaŭ nasupierak žadańniu žycharoŭ źmiaścili čyrvona-zialonyja ściahi. Na niejki čas u kvartale adklučali vadu i aciapleńnie. Heta patłumačyli avaryjaj, ale žychary ŭspryniali heta jak formu pomsty. Novaja Baravaja nie ŭnikalnaja. I ŭ navakolnych nasielenych punktach Minskaha rajona pa aficyjnych pratakołach Cichanoŭskaja nabirała ad 60 da 90 pracentaŭ hałasoŭ.
«Usio toje, što adbyvajecca ŭ nas u krainie, nam strašna nie padabajecca, — skazaŭ «Našaj Nivie» žychar Novaj Baravoj Alaksandr. — Takoje ŭražańnie, što zakona bolš niama. Z druhoha boku, heta združvaje, dapamahajem zatrymanym susiedziam».
