Chto heta taki?
Mužčynu 38 hadoŭ. Raniej jon niaredka traplaŭ u ŚMI, ale zusim ź inšaj nahody. Lińnik — staršynia Biełaruskaha kryptafizičnaha kamiteta.
Kryptafizičny kamitet — heta niekamiercyjnaje abjadnańnie, jakoje było stvorana jašče ŭ 2006 hodzie «dla praviadzieńnia daśledavańniaŭ u halinie kryptafiziki i ŭfałohii».
U 2014 hodzie Lińnik raskazvaŭ «Sovietskoj Biełoruśsii», što až 18 hadoŭ vyvučaje paranarmalnyja źjavy. Jon zasnavaŭ Kryptafizičny kamitet, dzie na toj momant nibyta naličvałasia až 20 čałaviek, jakija praviarajuć źviestki ab paranarmalnych vypadkach.
Sam Rusłan Lińnik u vieraśni 2020 hoda apublikavaŭ videarolik pra svaju piersonu. Raskazaŭ, što naradziŭsia ŭ Minsku, paśla ŭ dziacinstvie siamja pierabrałasia ŭ Horki, dzie Lińnik skončyŭ škołu. Zatym viarnuŭsia ŭ Minsk.
«Ja paśla škoły nie pastupaŭ nikudy, mieŭ admoŭnaje staŭleńnie da sistemy adukacyi», — pryznavaŭsia błohier.
Z 2004 pa 2010 hod jon pracavaŭ na kanviejery Minskaha aŭtazavoda. Va ŭzroście 28 hadoŭ pastupiŭ va ŭniviersitet, atrymaŭ adukacyju pa śpiecyjalnaści dziaržaŭnaje kiravańnie i prava. Pracavaŭ mieniedžaram pa prodažach, ale, kaža sam Rusłan, chacieŭ trapić na dziaržsłužbu.
«Atrymałasia, ale prapracavaŭ tam tolki hod. Syšoŭ, bo nie bačyŭ dla siabie budučyni — treba było maŭčać, ja nie moh», — skazaŭ błohier.
Byŭ žanaty, raźvioŭsia na pačatku 2020 hoda.
Jutub-kanał Rusłan zavioŭ hod tamu.
Spačatku Lińnik vykładvaŭ na svaim kanale roliki pra ŭsio na śviecie. U ich była sumieś sacyjalnych temaŭ, teoryj zmovy, psieŭdaanalityki i prosta hłupaj demahohii. «Karanavirus zapuścili z palityčnymi metami», «Amierykancy rychtujuć novuju suśvietnuju vajnu», «Babaryka vidavočna ahient Kramla» — takija rečy raskazvaŭ Lińnik u svaich videa.
«Ja aceńvaju infarmacyju, sychodziačy taksama sa znakaŭ. Ja viedaju, jak pracuje ekstrasensoryka, chto staić za takimi ludźmi, jak Vanha», — kazaŭ jon.
Asablivaj papularnaściu roliki nie karystalisia. Ale pastupova ŭ videa błohiera stanaviłasia ŭsio bolš i bolš palityčnych i vostrych temaŭ, adpaviedna, prahlady pačali raści. Samyja papularnyja jaho videa naźbirali 850, 694 i 480 tysiač prahladaŭ.
Siońnia na kanał Lińnika padpisanyja 90 tysiač čałaviek — dla Biełarusi heta vialikaja ličba.
Vykazvaŭsia Lińnik rezka i pra ŭładu, i pra situacyju ŭ krainie, i piersanalna pra Łukašenku. Vykazvaŭsia pra źvierstvy siłavikoŭ, krytykavaŭ ich dziejańni. Ale heta znoŭ ža časam spałučałasia z vysmaktanaj z palca analitykaj i časam prosta fejkavymi navinami. Naprykład, u adnym ź videa Lińnik śćviardžaŭ, što siłaviki biez apaznavalnych znakaŭ — heta rasijski AMAP, jaki pracuje na biełaruskich vulicach.
Ale čamu błohier zatrymany i što kankretna stavicca jamu ŭ vinu, pakul nieviadoma.
«Nam nie ŭdałosia apieratyŭna atrymać kamientar Śledčaha kamiteta. Adnak baćka Rusłana paćvierdziŭ infarmacyju ab jaho zatrymańni. Pra toje, što Rusłan na Akreścina, baćka daviedaŭsia ad advakata», — paviedamiŭ Tut.by.
