Na Vitala Bujnoŭskaha miascovyja milicyjanty skłali pratakoł pavodle artykuła 23.34 za praviadzieńnie niesankcyjanavanaha pikietu. Prykmietami pikietu stali japonski ściah (čyrvony kruh na biełym pałotniščy) u vaknie, biełyja i čyrvonyja plastykavyja stužački i balončyki, jakija visieli na balkonie doma, a taksama nadpis «Heta nia ściah». Vitala papiaredzili, što razhlad administracyjnaj spravy, składzienaj pavodle hetaha pratakołu, adbudziecca, mahčyma, 19 studzienia.
18 studzienia ŭ pieršaj pałovie dnia Vital vyjšaŭ ź miascovaha izalatara časovaha ŭtrymańnia, dzie adbyŭ dva dni ŭ kamery ź biazdomnymi i amatarami zašmat vypić.
Symbolika jakoj krainy zabaronienaja?
Rezčyk pa kamieni Vital Bujnoŭski i jahonaja žonka Kaciaryna ź dziećmi žyvuć u Dziaržynsku ŭ pryvatnym domie. Ź leta na domie visieŭ bieł-čyrvona-bieły ściah, taksama dom byŭ upryhožany adpaviednymi stužačkami i balonikami. Za addanaść biełaruskaj histaryčnaj symbolicy haspadaroŭ domu ŭžo 5 razoŭ štrafavali. Moža, ciapier Vitala i nie pasadziać, ale novaha štrafu, jak jon ličyć, paźbiehnuć nia ŭdasca.
«Milicyjanty, što pryjechali da nas, byli našyja. Pytajusia ŭ ich: a čamu ściah Japonii vy zaličyli ŭ zabaronienuju symboliku? Što mnie, skardzicca ŭ ambasadu Japonii, ci jak? Paciskajuć plačyma. Kažuć, sud chaj vyznačaje, a ichnaja sprava — adabrać. Kali što, dyk paabiacali ŭsio viarnuć, i ściah japonski. Ale, miarkuju, rašeńnie pradvyznačanaje. Sami skazali, što majuć zahad ź Miensku, maŭlaŭ, naš dom staŭ viadomy na ŭsiu Biełaruś, zahadana razabracca», — raskazvaje Vital pra razmovu ź milicyjantami, jakaja adbyłasia ŭ minułuju subotu va ŭpravie milicyi Dziaržynskaha rajonu.
Pavodle Vitala Bujnoŭskaha, jon admoviŭsia padpisvać pratakoł ab administracyjnym parušeńni i ŭvohule pakidać u im svajo tłumačeńnie. «A što tut tłumačyć? Na jakoj zakonnaj padstavie mnie mohuć dyktavać, što možna va ŭłasnym domie vyviešvać? Niama takoha zakonu, heta samaŭpraŭstva», — ličyć Vital Bujnoŭski.
Raniej u interviju žurnalistam adnosna pieršaha pratakołu za bieł-čyrvona-bieły ściah na domie Vital kazaŭ, što «adstupać dalej niama kudy» i ad nacyjanalnaha ściahu jon nie admovicca. Ci škaduje, što publična ahučvaŭ pazycyju, jakaja nie spadabałasia ŭładam?
«Pradbačyŭ heta, ale nie škaduju. Bo kali prosta paviesić ściah u šafu i samomu na jaho hladzieć, dyk ad hetaha karyści nijakaj. Ludzi pavinny viedać pra tvaju pazycyju. Ale heta majo prava na vykazvańnie dumki, i heta nijaki nie pikiet — ściah u vaknie, tym bolš unutry doma, i tym bolš ściah japonski. Moža, zaŭtra mianie ŭ japonskija špijony zapišuć? Dyk takoje ŭ historyi ŭžo było, i dapuścić, kab heta paŭtaryłasia, nielha», — miarkuje Vital Bujnoŭski.
Adna konaŭka na 6 aryštantaŭ
U izalatary časovaha ŭtrymańnia ŭ Dziaržynsku Vital Bujnoŭski pravieŭ amal dva dni — ź viečara 16 studzienia pa poŭdzień 18-ha.
«Kampanija była zbolšaha niebłahaja. Pahavoryš z kožnym paasobku, dyk narmalnyja ludzi, sa svaimi prablemami, navat dramaj. Ahulnaje toje, što nia mohuć siabie znajści, bo ŭ horadzie niama pracy, uciahnulisia ŭ zahannaje koła vypiŭki. Im by dapamahčy, a ich sadžajuć», — zhadvaje Vital byłych sukamernikaŭ.
Na choład i ježu Vital nia skardzicca, ale što da vykanańnia praviłaŭ sanitaryi, vielmi aktualnych u časy pandemii karanavirusu, dyk tut jon ubačyŭ šmat prablem.
«Z harbataj była prablema, jakaja dakładna moža pryvieści da pieradačy zachvorvańnia. Sprava ŭ tym, što na ŭsiu kameru vydali tolki adnu konaŭku. Tamu razdatčyk ježy haračuju vadu dla harbaty spačatku raźlivaŭ u plastykavy kantejner, a potym my tudy kidajem svaje pakunački z zavarkaj. I ŭžo adtul pjem harbatu, pa čarzie, karystajučysia adnoj konaŭkaj. Jasna, što kali niechta chvory na karanavirus, dyk padchapić mohuć usie. Ale administracyju heta nie chvaluje», — kaža Vital Bujnoŭski.
Druhim faktaram ryzyki Vital ličyć toje, jak u izalatary myjuć posud. Pavodle Bujnoŭskaha, haračaj vady ŭ vodapravodnym kranie nie było, da taho ž u kamery było zabaroniena mieć plastykavyja butelki, u jakich zvyčajna viaźni nahravajuć vadu, zacisnuŭšy pamiž ścianoj i batarejaj. Takoj ciopłaj vadoj možna było myć miski paśla ježy, ale i jaje niama, adznačaje były viazień.
«Tamu musili myć miski chałodnaj vadoj z-pad krana. A ci myŭ chto ich paśla nas, nieviadoma. Miarkuju, što nie».
Taksama Vital Bujnoŭski źviarnuŭ uvahu na toje, jak farmalna vykonvałasia ŭ IČU Dziaržynskaha rajonu praviła abaviazkovaha karystańnia medyčnymi maskami.
«U kamery ŭsie, naturalna, siadziać biaz masak, bo inakš užo praz hadzinu vielmi ciažka dychać. Pryčym za dva dni nichto dezynfekcyi nie pravodziŭ, nas na prahułki ci ŭ duš nie vyvodzili. Zatoje kali ŭvachodzić milicyjant, dyk jon u mascy i nam zahadvaje nadzieć maski. Tamu ŭźnikaje ŭražańnie, što jany tolki pra siabie kłapociacca, kab nie padčapić «karonu», a što z aryštantami budzie, im usio roŭna», — miarkuje Vital Bujnoŭski.
Jon kaža, što ŭ horadzie abstanoŭka z karanavirusam ciapier bolš napružanaja, čym była ŭ kancy minułaj viasny.
«Ciapier šmat znajomych chvareje ci ŭžo pierachvareli. Hetak časta pra heta kažuć, što ŭžo pryzvyčailisia», — adznačaje Vital Bujnoŭski. Sam jon symptomaŭ zachvorvańnia pakul nie adčuvaje.
Ahułam siamju Bujnoŭskich aštrafavali za ściahi na domie ŭžo bolš jak na 2 tysiačy rubloŭ.
«Jak budziem płacić, nia viedaju. Pracy niama, usio staić. Budziem dumać», — kaža Vital Bujnoŭski.
