Pastanova, jakuju jany pradjavili, padpisanaja prakuroram Kryčaŭskaha rajona Leanidam Palevičam, paviedamlaje BAŽ.
Pavodle Niaroŭnaha, padstavaj dla praviadzieńnia ahladu ŭ kvatery staŭ raźmieščany ŭ adnym z telehram-kanałaŭ fotazdymak hrupy žycharoŭ rajcentra, jakija stajać ź bieł-čyrvona-biełym ściaham nasuprać rajvykankama. Siarod udzielnikaŭ akcyi supracoŭniki milicyi nibyta ŭbačyli čałavieka, vielmi padobnaha da Niaroŭnaha.
«Na fota vyjava šaści čałaviek, jakija stajać ź vializnym bieł-čyrvona-biełym ściaham nasuprać budynka rajvykankama — adzin z hetych ludziej z vusami. Milicyjanty paličyli, što jon padobny da mianie. Fota nibyta zroblena 13 studzienia, pryčym u śvietły čas sutak. Ja liču, što, chutčej za ŭsio, heta fotašop», — raspavioŭ Siarhiej Niaroŭny karespandentu słužby manitorynhu HA «BAŽ».
Ahladali kvateru Niaroŭnaha supracoŭniki Kryčaŭskaha RAUS Eduard Kraŭcoŭ i Siarhiej Jahoraŭ. Ahlad praciahvaŭsia kala dźviuch hadzin, dziejańni milicyjantaŭ fiksavalisia na videarehistratar. Pavodzili siabie jany prystojna, nijakich pahroz nie pramaŭlali, kaža žurnalist.
Ale cikavilisia, na jakija srodki žyvie Niaroŭny, ci jeździć jon u Minsk na pratesnyja akcyi, čalcom jakoj partyi źjaŭlajecca. Žurnalist admoviŭsia adkazvać na hetyja pytańni, spasłaŭšysia na artykuł 27 Kanstytucyi Biełarusi.
U vyniku milicyjanty zabrali ŭ Niaroŭnaha kampjutar, choć jon nie davaŭ na heta svajoj zhody. Pry hetym nie pakinuli nijakaha dakumienta pra vyniatak techniki, tolki paviedamili, što zabirajuć «na ekśpiertyzu». Jana pavinna adbycca na praciahu miesiaca.
«Mnie nie dali nivodnaj papiery. Ja abaviazkova budu pisać skarhu ŭ prakuraturu», — adznačyŭ Siarhiej Niaroŭny.
Taksama pravaachoŭniki paviedamili Siarhieju Niaroŭnamu, što ŭ dačynieńni da jaho raspačaty administracyjny praces za parušeńnie paradku arhanizacyi i praviadzieńnia masavaha mierapryjemstva (pavodle art. 23.34 KaAP). Byŭ składzieny pratakoł apytańnia.
Žurnalist ličyć, što kryčaŭskija milicyjaniery spadziajucca znajści ŭ jaho kampjutary niejkija kampramietujučyja materyjały. U Kryčavie paśla žniŭnia rehularna prachodziać «partyzanskija» akcyi pratestu, ale milicyja pakul nie moža znajści ich udzielnikaŭ. U milicyi čamuści paličyli, što žurnalist moža być datyčny da arhanizacyi akcyj.
