Śledčyja dziejańni ŭ suviazi z mahčymym «biełaruskim śledam» u spravie zabojstva žurnalista Paŭła Šaramieta mohuć być praviedzienyja na terytoryi Jeŭropy ŭžo ŭ studzieni. Pra heta zajaviŭ ministr unutranych spraŭ Ukrainy Arsien Avakaŭ žurnalistam u Charkavie ŭ aŭtorak, cytuje jaho «Interfaks-Ukraina».
Ministr paćviardžaje, što ŭkrainskija pravaachoŭniki vałodajuć bolšym abjomam materyjałaŭ, jakija śviedčać ab tym, što da 2012 hoda ŭ biełaruskich śpiecsłužbach abmiarkoŭvałasia mahčymaść zabojstva žurnalista Paŭła Šaramieta, čym toj, jaki byŭ abnarodavany ŭ ŚMI.
Avakaŭ adznačyŭ, što śledčyja jašče praciahvajuć analizavać atrymanyja dakumienty.
«U śniežni my atrymali trochi bolš materyjałaŭ, čym byli apublikavanyja ŭčora (4 studzienia) u presie, jakija nam pakazvajuć, što ŭ kołach biełaruskich śpiecsłužbaŭ da 2012 hoda — apošniaja data, pa-mojmu, krasavik 2012 hoda — abmiarkoŭvalisia pytańni, źviazanyja z zabojstvam Paŭła Šaramieta. Hetyja materyjały byli nami tady pryniatyja. U nas zrobleny ceły šerah mižnarodna-pravavych daručeńniaŭ z tych časoŭ», — skazaŭ ukrainski ministr.
