Pavieł Bieraśnieŭ na sudzie. Fota Nastaśsi Utkinaj.
Naprykancy śniežnia ŭ maładziečanskim sudzie razhledzieli kryminalnuju spravu Paŭła Bieraśnieva. Jaho abvinavačvali ŭ abrazie načalnika miascovaha RAUS Vadzima Pryhary, paviedamlaje Rehijanalnaja hazieta.
Sudovaje raźbiralnictva viała sudździa Viktoryja Palaščuk. Dziaržaŭnym abvinavaŭcam vystupiła pamočnik prakurora Alena Bałocina. Abvinavačvajemaha abaraniaŭ advakat Aleh Piatroŭ.
Pavieł Bieraśnieŭ — były śledčy maładziečanskaj milicyi, dzie jon pracavaŭ u 1990-ch. Jaho abvinavačvali pa artykule 369 «Abraza pradstaŭnika ŭłady» Kryminalnaha kodeksa Biełarusi. Pa materyjałach spravy ŭviečary 13 vieraśnia Bieraśnieŭ namalavaŭ na budynku pa vulicy Vilenskaj 23B u Maładziečnie nadpis, jaki zajaŭnik rascaniŭ jak abraźlivy. Abvinavačvajemy pryznaŭ vinu.
Paciarpieły Pryhara
Načalnik Maładziečanskaha RAUS Vadzim Pryhara raskazaŭ na pasiadžeńni, što ŭ pieršaj pałovie vieraśnia na budynku raźmiaščali nadpisy, jakija prybirali kamunalnyja słužby, ale jany znoŭ źjaŭlalisia na nastupny dzień. Milicyja pryniała kompleks mier, kab złavić pravaparušalnika.
Načalnik maładziečanskaj milicyi paličyŭ, što nadpis, jaki namalavaŭ Bieraśnieŭ, datyčacca asabista jaho. Bo ŭ Maładziečnie i rajonie niama ludziej z takim proźviščam. Heta jon pravieryŭ pa telefonnym daviedniku.
— Liču, što čałaviek pavinny za heta adkazać. Čałaviek pavinien panieści pakarańnie z nakiravańniem u papraŭčuju ŭstanovu, — skazaŭ Pryhara adnosna mahčymaha pakarańnia.
Načalnik Maładziečanskaha RAUS Vadzim Pryhara.
Pryhara padaŭ hramadzianskuju pozvu na pakryćcio maralnaj škody. Jon acaniŭ jaje ŭ 10 tysiač rubloŭ. Pryhara źbirajecca addać hetyja hrošy ŭ dom-internat u Radaškavičy.
Advakat Piatroŭ paprasiŭ Pryharu abhruntavać sumu maralnaj škody.
— Mnie było niepryjemna. Prychodzili hramadzianie i pytalisia, chiba heta vas nie abražaje, ci nie možacie znajści parušalnika. Taksama zvanili z rajvykankama, što šmat vydatkavali na farbu, kab zamalavać.
Ź Bieraśnievym Pryhara sustreŭsia paśla jaho zatrymańnia, pravodziŭ ź im prafiłaktyčnuju hutarku.
Bieraśnieŭ: Ci vykazvali vy pahrozy pasadzić mianie ŭ turmu?
Pryhara: Nie.
Śviedki Zakamski i Jakaŭleŭ
Zachar Zakamski i Ivan Jakaŭleŭ pracujuć milicyjanierami patrulna-pastavoj słužby Maładziečanskaha RAUS. Uviečary 13 vieraśnia milicyjaniery pabačyli Bieraśnieva la budynku pa Vilenskaj, toj išoŭ z pakietam i, pa ich mierkavańni, vioŭ siabie padazrona. Tamu supracoŭniki vyrašyli prasačyć za Bieraśnievym.
Jany abyšli budynak, pabačyli, što Bieraśnieŭ niešta maluje bałončykam na ścianie zbudavańnia. Bieraśnieva schapili, pyrsnuli hazam u tvar i nadzieli kajdanki. Zatym dastavili ŭ pastarunak.
Čyrvonym koleram abviedzieny budynak, na jakim namalavaŭ nadpis Bieraśnieŭ.
Śviedki Kužoŭniki
Uviečary 13 vieraśnia Iłona Kužoŭnik razam sa svaim mužam Dźmitryjem była ŭ haściach u chrosnaj Iryny Pierłaškievič i jaje hramadzianskaha muža Paŭła Bieraśnieva. Jany razam viačerali, paśla Bieraśnieŭ advioz Kužoŭnikaŭ dadomu. Jany nie bačyli ŭ Bieraśnieva bałončyk z farbaj, nie razmaŭlali ź im pra palityčnuju situacyju ŭ krainie. Pra jaho zatrymańnie Kužoŭniki daviedałasia ad Pierłaškievič.
Ekśpiert-linhvist Čarniacoŭ
Alaksiej Čarniacoŭ — dziaržaŭny sudovy ekśpiert dziaržaŭnaha Upraŭleńnia sudovych ekśpiertyz. Śviedčyŭ praź videasuviaź u Minskim abłasnym sudzie.
Čarniacoŭ zrabiŭ ekśpiertyzu, u jakoj vyjaviŭ, što ŭ nadpisu Bieraśnieva była niehatyŭnaja acenka asoby Pryhary.
Advakat adznačyŭ, što ekśpiert napisaŭ u ekśpiertyzie nie ŭsie tłumačeńni abrevijatury, jakaja abraziła paciarpiełaha Pryhary. Pa słovach abaroncy, u słoŭnikach jość inšaje tłumačeńnie abrevijatury: «čałaviek małaadukavany» (rus. «čiełoviek małoobrazovannyj»). Abvinavačvajemy rasšyfroŭvaje abrevijaturu, jakaja była ŭ nadpisu, jak «čałaviek Minskaj vobłaści» (rus. «čiełoviek Minskoj obłasti»).
Ekśpiert udakładniŭ, što abrevijatura, jakaja fihuravała ŭ nadpisu, nie źjaŭlajecca branaj. Pa jaho słovach, abrevijatura źjaŭlajecca narmatyŭnaj u kantekście nadpisu.
Hramadzianskaja pozva ad kampanii Batana i jaho śviedčańni
Iryna Kako — namieśnik dyrektara pa ekanomicy i finansach pryvatnaha ŭnitarnaha pradpryjemstva «Pani». Jana zajaviła hramadzianskuju pozvu ab pakryćci materyjalnaj škody. Kako paviedamiła, što Bieraśnieŭ užo apłaciŭ 307 rubloŭ, adnak kampanija hetym niezadavolenaja.
— Na budynkach kampanii čatyry razy byli malavali nadpisy. U sudzie razhladajecca tolki adzin vypadak, ale my ličym, što spadar Bieraśnieŭ vinavaty va ŭsich čatyroch vypadkach. My padajem hramadzianskuju pozvu na 5476,40 biełaruskich rubloŭ.
Dyrektar «Pani» Alaksandr Batan zajaŭlaŭ u milicyju, što budynak razmaloŭvajuć. Namieśnik načalnika milicyi paprasiŭ Batana dać klučy ad budynka, kab zrabić tam abłavu.
— Ja bačyŭ nadpis ranicaj nastupnaha dnia. Potym pryjechali kamunalščyki i zakrasili jaje. Pa hetym epizodzie zakranuła tolki paneli. Hetyja paneli nie zamianili.
Batan acaniŭ škodu ŭ 1805,15 biełaruskich rubloŭ za vylikam sumy, jakuju Bieraśnieŭ užo apłaciŭ.
Pakazańni Bieraśnieva
Pakazańni Bieraśnieva schodziacca z pakazańniami śviedki Iłony Kužoŭnik. Paśla taho, jak Bieraśnieŭ advioz Kužoŭnikaŭ dadomu, jon viarnuŭsia da domu Pierłaškievič. Pakinuŭ u dvarach aŭtamabil, niejki čas hulaŭ. Paśla spyniŭsia kala budynku pa Vilenskaj 23B, dastaŭ z pakietu bałončyk ź siniaj farbaj i pačaŭ pisać nadpis na ścianie zbudavańnia. Jon nie viedaje, čamu vyrašyŭ heta zrabić.
— Mahčyma, ja chacieŭ niešta sabie dakazać. Chacieŭ zrabić fota, potym zamalavać nadpis. Fota nie źbiraŭsia raspaŭsiudžvać. Moj učynak byŭ impulsiŭnym.
Potym Bieraśnieŭ pabačyŭ, jak da jaho bieh nieviadomy. Jon raźviarnuŭsia ŭ inšy bok, jaho schapiŭ inšy čałaviek. Bieraśnieŭ nie razumieŭ, što heta supracoŭniki milicyi. Tyja nadzieli kajdanki, a na prośbu pakazać paśviedčańnie pyrsnuli piarcovym bałončykam u tvar.
Pry zatrymańni chtości ź milicyjanieraŭ skazaŭ, što Bieraśnieŭ dobra trapiŭ, bo zrabiŭ nadpis pra načalnika milicyi. Bieraśnieŭ bajaŭsia, kab jaho dziejańni nie kvalifikavali jak chulihanstva, tamu prydumaŭ matyŭ, što nadpis datyčycca načalnika Maładziečanskaha RAUS.
Bieraśnieŭ adznačaje, što napisaŭ pra Michaiła Pryharu, jakomu Viarchoŭny sud prysudziŭ try hady za karupcyjnyja złačynstvy. Abvinavačvajemy nie pryznaŭ hramadzianskija pozvy ad kampanii «Pani» i Vadzima Pryhary.
Bieraśnieŭ adznačyŭ, što ŭ pastarunku pry składańni pratakołu apytańnia jaho trymali ŭ kajdankach i nie davali pamyć tvar paśla piarcoŭki. Jon paličyŭ heta katavańniami. U apošnim słovie Pavieł Bieraśnieŭ skazaŭ, što jaho vina nie dakazanaja, a pakazańni śviedkaŭ Zakamskaha i Jakaŭleva byli niepaśladoŭnymi.
Prysud
Dziaržaŭny abvinavaŭca naadvarot paličyła vinu Bieraśnieva dakazanaj i zaprasiła dla jaho paŭtary hady abmiežavańnia voli z nakiravańniem u papraŭčuju ŭstanovu adkrytaha typu. Jana prasiła źmienšyć kolkaść sumy pa hramadzianskaj poźvie Pryhary da razumnaj, a pozvu ad kampanii «Pani» razhladzieć u hramadzianskaj sudavytvorčaści.
Sudździa Viktoryja Palaščuk pryznała Paŭła Bieraśnieva vinavatym.
Jamu prysudzili paŭtara hady abmiežavańnia voli ŭ papraŭčaj kałonii adkrytaha typa.
Kampiensacyja za maralnuju škodu načalniku Maładziečanskaha RAUS Vadzimu Pryhary skłała čatyry tysiač rubloŭ.
Hramadzianskuju pozvu ad kampanii «Pani» buduć razhladać u cyvilnaj sudavytvorčaści.
