3 śniežnia ŭ sudzie Pieršamajskaha rajona Minska byŭ vyniesieny prysud pa spravie ab nadpisach na damach, dzie žyvuć supracoŭniki AMAPa. Dziaržabvinavaŭca ŭ sprečkach admoviŭsia ad farmuloŭki «cyničnyja» i zapatrabavaŭ dla 25-hadovaha fihuranta miesiac aryštu, sud u vyniku prysudziŭ jaho da štrafu 5400 rubloŭ, piša Tut.by.
6 kastryčnika 25-hadovy Hierman Kuźniacoŭ pakinuŭ dva nadpisy na budynkach na vulicy Hierojaŭ 120-j dyvizii, dzie pražyvajuć supracoŭniki staličnaha atrada milicyi asablivaha pryznačeńnia. Bałončykam jon napisaŭ: «AMAP, jak heta — hladzieć u vočy svaim dzieciam, *** (u značeńni pryznanyja vinavatymi ŭ pazbaŭleńni žyćcia)» i «Amapaŭcy! Na pracy *** (u značeńni pazbaŭlać žyćcia), *** (u značeńni ździajśniać złačynstvy suprać pałavoj niedatykalnaści), a doma całavać?»
U abvinavačvańni adznačałasia, što «hrubyja i cyničnyja nadpisy abražajuć honar i hodnaść hramadzian, demanstrujuć hrebavańnie da maralnych kaštoŭnaściaŭ i hramadskaha paradku, tym samym vyklikajuć u hramadzian pačućci abureńnia». U materyjałach spravy adsutničała ekśpiertyza ŭ častcy «cyničnaści» nadpisaŭ, u sprečkach prakuror admoviŭsia ad hetaj farmuloŭki.
Škoda minskaj milicyi i «Minskenierha» (adna z nadpisaŭ była na transfarmatarnaj budcy) acanili ŭ 216 rubloŭ.
Zatrymali Hiermana žychary tych samych damoŭ, potym pieradali jaho supracoŭnikam AMAPa pry vykanańni. Paśla zatrymańnia pres-słužba MUS apublikavała videa, dzie małady čałaviek kaža, što nanios nadpisy, kab źviarnuć uvahu na parušeńnie zakona, adznačaje, što dziejničaŭ na emocyjach i raskajvajecca.
U sudzie Kuźniacoŭ pryznaŭ, što parušyŭ zakon, ale, na jaho dumku, heta administracyjnaje pravaparušeńnie, kryminalnuju spravu zaviali z-za palityčnaj situacyi.
U vyniku Hierman pryznany vinavatym u paškodžańni majomaści ŭ inšych hramadskich miescach pry adsutnaści prykmiet bolš ciažkaha złačynstva, na padstavie art. 341 KK jamu pryznačany štraf 200 bazavych vieličyń, što składaje 5400 rubloŭ. Spravu razhladaŭ sudździa Maksim Trusievič.
Dziaržabvinavaŭca prasiŭ miesiac aryštu. Z ulikam niekalkich sutak u IČU i nastupnaha chatniaha aryštu pry pryznačeńni takoha pakarańnia Hierman Kuźniacoŭ moh być svabodny adrazu paśla ŭstupleńnia ŭ siłu prysudu. Adnak ciapier jon pavinien zapłacić štraf, škodu jon užo pahasiŭ. Prysud u zakonnuju siłu nie ŭstupiŭ i moža być abskardžany.
