Dziaŭčaty stali źbiracca ŭ rajonie Płoščy Pieramohi da 16:00. Jany pastroilisia ŭ łancuh salidarnaści pa abodva baki praśpiekta. Da miesca praviadzieńnia akcyi padjechali niekalki aŭtazakaŭ, supracoŭniki AMAPa prasili ŭdzielnic razyścisia, u niekatorych pierapisali źviestki.
Praź niekalki chvilini žanočaja kałona rušyła ŭzdoŭž praśpiekta Niezaležnaści ŭ bok cyrka, ale darohu im pieraharadzili siłaviki. Paśla hetaha pratestoŭcy razharnulisia ŭ bok płoščy Jakuba Kołasa, a zatym — u bok Akademii navuk. U akcyi ŭdzielničali da 10 tysiač čałaviek. Siarod udzielnic — člen Kaardynacyjnaj rady Maryja Kaleśnikava.
Kala AN darohu znoŭ pieraharadzili siłaviki, i kałona rušyła ŭ advarotny bok.
Dźvie novyja papularnyja kryčałki na siońniašniaj akcyi — «Usie nie ŭlezuć!», «Skora skončycca bienzin!» (u bok aŭtazakaŭ) i «Chopić nas pužać!».
Vialiki entuzijazm u pratestoŭcaŭ vyklikajuć ludzi, jakija vitajuć ich z akon i bałkonaŭ svaich kvater. Furor u žanočaj demanstracyi vyklikaŭ mužčyna z hołym torsam i kocikam u rukach
Potym žančyny rušyli na Kamaroŭku.
Padčas akcyi byli zatrymanyja niekalki mužčyn, u tym liku ŭ pramym efiry žurnalisty «Radyjo Svaboda» Aleś Pilecki i Andrej Rabčyk, «Niamieckaj chvali» Paŭluk Bykoŭski i KP u Biełarusi Śviatasłaŭ Zorki. Dvuch apošnich adpuścili.
