Alaksandr Łukašenka, adkazvajučy na pytańni žurnalistaŭ u Oršy, prakamientavaŭ svajo pryniaćcie pieršaj prezidenckaj prysiahi pad bieł-čyrvona-biełym ściaham, pieradaje BiełTA.
«Mianie za heta nie treba krytykavać. Razumny čałaviek skaža: prezident zakonapasłuchmiany. Tady byŭ taki ściah, vyznačany Viarchoŭnym Savietam (my nie hałasavali za hetuju simvoliku, ale bolšaściu jana była pryniataja pad ciskam našych nacyjanalistyčnych deputataŭ), — skazaŭ Łukašenka. — Nijakaj kanśpirałohii. Inakš ja tady zrabić nie moh, ja pavinien byŭ być prezidentam dla ŭsich, i zakonapasłuchmianym. Ja tak i rabiŭ».
Alaksandr Łukašenka adznačyŭ, što za ciapierašniuju dziaržaŭnuju simvoliku na referendumie prahałasavała bolšaść hramadzian, i jon z zadavalnieńniem vykarystoŭvaje jaje.
«Narod vykazaŭsia za hetuju simvoliku. A hety ściah, vy ž bačycie: partrety Adolfa Hitlera i vakoł visiać bieł-čyrvona-biełyja ściahi».