U horadzie Zasłaŭje sioleta ŭ pieršy kłas pojdzie, pa maich padlikach, nie mieniej za 300 dzietak. I jak vy dumajecie, kolki baćkoŭ napisali zajavy na navučańnie pa-biełarusku? 97 pracentaŭ? Nie, navat nie 3%. Tolki dźvie zajavy, heta 0,7%. Heta vam adrazu i adkaz, čamu našy najbolš papularnyja kandydaty ŭ prezidenty navat nie ŭzdymajuć moŭnaje pytańnie. Marnavać čas dziela 0,7%?
Možna tracić kuču sił, pryvodziačy vyniki pierapisaŭ, ale i maje asabistyja nazirańni, i voś hetaja voś statystyka z zajavami baćkoŭ pakazvaje, što nas realna mieniej adnaho pracenta. Moža pakul i bolš, ale dzieci padrastuć, i budzie 0,7%.
Maja stužka fejsbuka strakacić biełaruskaj movaj, ale heta ŭsio asablivaści ałharytmaŭ i moj vybar virtualnych siabroŭ. A taksama jašče adzin niezrazumieły dla mianie momant, kali mnohija baćki, jakija i na publicy, i ŭ virtualnaj prastory biełaruskamoŭnyja, u siamji havorać pa-rusku i addajuć svaich dziaciej taksama vučycca pa-rusku. Bo «my nie chočam abmiažoŭvać ich mahčymaści», «my chočam, kab jamu/ioj było praściej», «treba vučyć anhlijskuju, a biełaruskaja moža być i ŭ sercy».
Čytajcie taksama: «I vy ŭsio jašče ličycie biełarusaŭ bajaźliŭcami?»
Chto jašče nie znajomy — znajomciesia: heta Adelka, joj 6 hod i jana źbirajecca ŭ pieršy kłas Zasłaŭskaj himnazii.
Adela Małyščyc choča vučycca pa-biełarusku i nie ŭjaŭlaje sabie inšaha
Pakul my jedziem u Zasłaŭje na mašynie, jana skača ad radaści, kali bačyć biełaruskamoŭnyja bihbordy i kali čuje pa radyjo «Stalica» biełaruskija pieśni. Heta jana pisała «Knišku pra zorki» i hałasavała za «Ryku Babu» ŭ majoj stužcy. I, chutčej za ŭsio, jana pojdzie ŭ ruskamoŭny kłas. Bo z 16-tysiačnaha horada, akramia nas, pa-biełarusku vučyć pieršakłaśnika choča tolki adna siamja.
Dyrektar himnazii Alaksandr Alaksandravič — vielmi pryjemny čałaviek, biełaruskamoŭny, absalutna «naš». Ale jon ciažka ŭzdychaje i kaža, što apošni raz adčyniaŭ biełaruskija kłasy ŭ Zasłaŭi bolej jak 10 hod tamu. I kali b choć ź dziasiatak žadajučych nabraŭsia, uziaŭsia b iznoŭ zrabić taki kłas. Kali raptam u vas niechta źbirajecca ŭ pieršy kłas u Zasłaŭi ci pobač z hetym horadam, pamiatajcie — vy možacie napisać zajavu ŭ himnaziju na navučańnie pa-biełarusku. Navat kali vy nie znachodziciesia ŭ śpisie vulic, prypisanych da himnazii — usio adno možacie padać zajavu, u krajnim vypadku pa miescy rehistracyi vas zaŭsiody voźmuć. Kali zajavu vy ŭžo padali — nichto nie pieraškadžaje pierapisać jaje i ŭkazać biełaruskuju movu navučańnia. Chto viedaje — moža my zmožam pakazać, što my taksama isnujom?
A heta taja samaja «Kniška pra zorki»
Banalna tut pisać słovy Franciška Bahuševiča, ale tak — nie budzie našaj movy, nie budzie i našaj nacyi. Nie pakidajcie ž jaje, kab nie ŭmiorli. Nie pazbaŭlajcie svaich dzietak ščaścia być biełarusami.
