MZS Biełarusi pakul nie płanuje pazbaŭlać akredytacyi žurnalistaŭ «Radyjo Svaboda», zajaviŭ kiraŭnik MZS Uładzimir Makiej, piša Tut.by.
— «Radyjo Svaboda», nakolki mnie viadoma, źjaŭlajecca uradavaj strukturaj ZŠA. I šmat chto z žurnalistaŭ, akredytavanych tut u Biełarusi, pracujuć u jakaści karespandentaŭ «Radyjo Svabody». Kali jany chočuć pracavać tam u jakaści štatnych supracoŭnikaŭ «Radyjo Svaboda» — heta adno, ale kali jany buduć zajmacca adnačasna, umoŭna kažučy, inšaj dziejnaściu, źviazanaj ź ich pracaj u niejkich niezaležnych telekanałach, tielehram-kanałach, to heta inšaje. I, viadoma ž, padobnym dziejańniam u adpaviednaści z zakanadaŭstvam moža być dadziena adpaviednaja acenka. Bolš za toje, ja chaču skazać, što my kantaktavali z našymi amierykanskimi partniorami na hety kont, i ŭ nas adnolkavyja pohlady na hetaje pytańnie, — skazaŭ Makiej.
Na pytańnie, ci jość na siońnia rašeńnie ab pazbaŭleńni «Radyjo Svaboda» akredytacyi, Makiej skazaŭ, što pakul takoha namieru niama.
— Pres-sakratar viadzie ŭsie hetyja pytańni i zaŭsiody dakładvaje mnie niejkija haračyja naviny. Va ŭsiakim razie pakul jon nie dakładvaŭ ab tym, što jość žadańnie pazbavić kahości akredytacyi». Ale, paŭtarusia, luby hramadzianin u Biełarusi, niezaležna ad zajmanaj pasady i miesca pracy, pavinien vykonvać adpaviednyja normy našaha zakanadaŭstva. Ja razumieju, što proźvišča, jakoje było nazvana (havorka pra Ihara Łosika). ja razumieju, što ŭ čarhovy raz budu uklučany ŭ śpis vorahaŭ prahresiŭnaha čałaviectva, ale ja chaču vykazać svoj punkt hledžańnia. Łosik, nakolki mnie viadoma, sapraŭdy vioŭ niejki tam telehram-kanał, — skazaŭ kiraŭnik MZS.
Na ŭdakładnieńnie, što Łosik źjaŭlajecca pazaštatnym kansultantam vydańnia, a nie akredytavanym žurnalistam, Makiej adkazaŭ, što raz jon maje dačynieńnie da «Svabody», to pavinien vykonvać praviły.
— Treba vyrazna adroźnivać, kali čałaviek značycca ŭ štacie, źjaŭlajecca pazaštatnym supracoŭnikam, jon pavinien, viadoma, vykonvać adpaviednyja praviły pavodzin, jakija isnujuć u dadzienaj struktury. Kali jon paralelna zajmajecca niejkimi inšymi rečami i parušaje, mahčyma, biełaruskaje zakanadaŭstva, značyć, mohuć być pryniaty adpaviednyja miery i jon pavinien razumieć heta, — skazaŭ Makiej. — Kiraŭnik MUS daŭ učora adpaviednyja kamientary, i kamientary na moj pohlad vyčarpalnyja. Viadoma, časam prysutničaje i čałaviečy faktar, kali ŭźnikajuć niejkija napružanyja situacyi. I, mahčyma, časam byvaje troški praźmiernaja reakcyja. Ale paśla taho, jak daviedalisia dadatkovuju infarmacyju i razabralisia z usim, usie byli adpuščanyja.
