Ukrainskija vajskoŭcy paśpiachova vyprabavali supraćkarabielnuju rakietu R-360 kompleksu VK-360MC «Nieptun» sa štatnaj bajavoj častkaj.
Jak paviedamlaje armyinform.com.ua, vyprabavańni prajšli na palihonie Alibiej u Adeskaj vobłaści. Adznačajecca, što puski prajšli paśpiachova, «Nieptun» trapiŭ u cel ź pieršaha razu.
Fota armyinform.com.ua.
Kryłataja rakieta R-360 vahaj 870 kh zdolnaja nieści bojehałoŭku masaj 150 kh. Dalokaść jaje pusku moža dasiahać 280 km, a chutkaść — kala 900 km/h, vyšynia palotu nad hrebniem chval — ad 3 da 10 mietraŭ. Kompleks zabiaśpiečvaje adnačasovy pusk da 24 rakiet.
Anałahičnyja vyprabavańni prajšli ŭ kancy maja. Tady stralba viałasia pa dvuch abjektach u Čornym mory ź intervałam u dźvie siekundy. Adna cel znachodziłasia na adlehłaści 85 km ad miesca ŭstanoŭki «Nieptuna», druhaja — za 110 km.
U lipieni 2019 hoda eks-kiraŭnik Rady nacyjanalnaj biaśpieki Ukrainy Alaksandr Turčynaŭ zajaviŭ, što kompleks «Nieptun» zmoža «ciaham niekalkich chvilin» źniščyć Krymski most i rasijskija vajskovyja karabli luboha kłasa. Jon adznačaŭ, što sistema kryłatych rakiet va Ukrainie ŭ apošnija hady była stvorana faktyčna z nula.
