«Halereja «Art-Biełaruś» znoŭ adčynić svaje dźviery z zaŭtrašniaha dnia. Na žal, biez karcin z karparatyŭnaj kalekcyi Biełhazprambanka, — paviedamlajecca na staroncy halerei ŭ fejsbuku. — Pracy možna budzie pahladzieć na vialikim prajektary, a bijahrafii aŭtaraŭ i historyi pałotnaŭ — z dapamohaj QR-kodaŭ u pustych ramach na čystych ścienach halerei», — pišuć kuratary halerei.
Pačynajučy z aŭtorka, 16 červienia, uvachod u halereju «Art-Biełaruś» svabodny.
Karciny z kalekcyi Biełhazprambanka byli kanfiskavanyja razam ź inšymi kaštoŭnaściami padčas vobšuku ŭ banku 11 červienia.
Ni pra jakija pretenzii da Biełhazprombanka, mieniedžaram jakoha doŭhi čas byŭ Viktar Babaryka, i kampanij siabroŭ Babaryki nie było viadoma, pakul hety bankir i miecenat nie zajaviŭ pra svaje prezidenckija ambicyi. Jon syšoŭ u adstaŭku z banka ŭ dzień, kali zajaviŭ pra svoj namier bałatavacca.
Sam Babaryka nazvaŭ dziejańni siłavikoŭ i zajavy Łukašenki ciskam na siabie.
«Usia maja dziejnaść, jakaja prachodziła na pasadzie kiraŭnika Biełhazprambanka ciaham 20 hadoŭ, nie vyklikała zaŭvah z boku pravaachoŭnych orhanaŭ, — skazaŭ jon 11 červienia. — My prachodzili ŭsie pravierki, u tym liku Nacbanka. Apošniaja — u studzieni. Ni razu pytańniaŭ nie było. Dziejańni siońniašniaha dnia nosiać zamoŭny charaktar», — skazaŭ jon.
Jon zaklikaŭ pravaachoŭnyja orhany trymacca zakonnaści.
«Ja čakaŭ cisku na mianie, i była infarmacyja, što ŭdar budzie pa mnie. Ale toje, što adbyłosia, pakazvaje, što suprać mianie ničoha niama. Ja hatovy da hetaha», — kaža Babaryka.
«Uvieś cynizm takich dziejańniaŭ u tym, što jany nakiravanyja nie na mianie, a nakiravanyja na maich siabroŭ i ludziej, ź jakimi ja pracavaŭ, — adznačyŭ pretendent na pasadu prezidenta ŭ svaim zvarocie. — Čamu heta zroblena? Bo pramoha kampramatu na mianie niama i ŭ ich jość vialikaja nadzieja, što ludziej zapałochajuć, prymusiać kazać niapraŭdu i ahavorvać druhich ludziej.
Ja mahu z dakładnaściu zajavić, što adzinymi pravilnymi pavodzinami i adkazam u hetaj situacyi, adkazam na hetaje biaźmiežža źjaŭlajecca praciah našaj baraćby.
Ja chaču źviarnucca da ŭsich tych, chto ŭžo padvierhsia dopytam, pieraśledam i vyklikam va ŭpaŭnavažanyja orhany.
Nie bojciesia kazać praŭdu. Nie kažycie chłuśniu, nie ahavorvajcie siabie i inšych ludziej. Kali treba, ja spadziajusia, što «Sumlennyja ludzi» zaŭsiody akažuć vam dapamohu — jak jurydyčnuju, tak i materyjalnuju», — zajaviŭ Babaryka.
Ataki na Babaryku abvastryli tanalnaść jaho vystupaŭ.
«Samaja vialikaja pamyłka ŭ hetych dziejańniach ułady ŭ tym, što toj Biełarusi, jakaja była raniej i jakuju jany papichali jak svoj statak, bolš nie isnuje. Biełaruś pračnułasia. I ja chaču skazać, što novaja Biełaruś źmiacie reštki hetaha staroha režymu», — skazaŭ jon u videazvarocie.
Pieraśled kaleh Viktara Babaryki pačaŭsia, kali stała viadoma, što jaho inicyjatyŭnaja hrupa sabrała rekordnuju dla alternatyŭnaha kandydata kolkaść podpisaŭ — 335 001 pa stanie na siońnia.
Raniej maksimum — 217 tysiač — sabraŭ u 1994-m, jašče na svabodnych vybarach, Zianon Paźniak. U Alaksandra Milinkieviča ŭ 2006-m było 198 tysiač. U Siamiona Domaša ŭ 2001-m — 164 tysiačy.
Čytajcie: Kolki podpisaŭ źbirali demakratyčnyja kandydaty na prezidenckich vybarach? Lidar — Paźniak TABLICA
Taksama i šerah apytańniaŭ pakazaŭ, što mienavita Viktar Babaryka moh by stać favarytam sumlennych vybaraŭ.
Babaryka sprabuje vybudavać šyrokuju antyłukašenkaŭskuju kaalicyju z udziełam samych roznych siłaŭ. Jaho kandydaturu padtrymała taksama nobieleŭskaja łaŭreatka Śviatłana Aleksijevič.
Čytajcie taksama: Babaryka zapisaŭ videazvaroty na vypadak svajho zatrymańnia
Biełhazprambank padčas kiravańnia im Viktara Babaryki skuplaŭ karciny ŭradžencaŭ Biełarusi va ŭsim śviecie i pryvoziŭ u Biełaruś, abvinavačvańnie ŭ namiery vyvieźci ich ź Biełarusi Babaryka nazvaŭ absurdnym.
