Alaksandr Łukašenka pravioŭ siońnia naradu, na jakoj abmiarkoŭvałasia realizacyja prajekta pa arhanizacyi vysokatechnałahičnaj ahrapramysłovaj vytvorčaści poŭnaha cykłu na 2016-2032 hady, pieradaje BiełTA.
«Heta naša pieršaje takoje pradpryjemstva ŭ hetaj halinie. I jano budzie zasiarodžana na vysokaefiektyŭnym karmleńni žyvioł, u vyniku čaho atrymajem kałasalny efiekt u žyviołahadoŭli i sumiežnych halinach. Heta pradpryjemstva, jakoje my budujem pad Minskam, padobna da atamnaj stancyi, pieršy błok jakoj zapuskajem u najbližejšy čas, padobna da stvareńnia ŭ Biełarusi vysokadakładnaj zbroi, kaśmičnych prajektaŭ, jakija my ažyćciavili i [nad jakimi] praciahvajem pracavać. Heta źviazana z vysokimi technałohijami, heta budučynia. Dadajcie da hetaha jašče IT-park i ličbavizacyju našaj krainy, nie tolki ekanomiki. Heta budučynia našaj dziaržavy, jak i luboj inšaj», — skazaŭ Alaksandr Łukašenka.
Pavodle jaho słoŭ, asobnyja ludzi admysłova «zabylisia», što ŭ krainie ciapier pracujuć nad kałasalnymi, miljardnymi prajektami, źviazanymi z vysokimi technałohijami. «Heta prajekty, jakija dazvolać zazirnuć u budučyniu. Moža być, kamuści chaciełasia, kab heta było bolš maštabna, šyrej. Ale treba razumieć, što heta vialikija hrošy. Hetaje pradpryjemstva nie novaje ŭ śviecie, ale, naturalna, nie kožnaja kraina moža sabie dazvolić takoje. U sadružnaści z KNR, pa damoŭlenaści ź Si Czińpinam my ažyćciaŭlajem hety prajekt. Jak ja razumieju, na praciahu hetaha i nastupnaha hoda my zdolnyja asvoić i zapuścić hetuju vytvorčaść», — adznačyŭ jon.
Arhanizacyjaj vysokatechnałahičnaj ahrapramysłovaj vytvorčaści poŭnaha cykłu zajmajecca Biełaruskaja nacyjanalnaja bijatechnałahičnaja karparacyja (BNBK). Budaŭnictva pa prajekcie pačałosia letam 2018 hoda ŭ Puchavickim rajonie Minskaj vobłaści. U jakaści hienpadradčyka i akcyjaniera vystupaje kitajskaja karparacyja CITIC Group. Płanujecca pabudavać kompleks z 14 zavodaŭ z paetapnym uviadzieńniem u stroj. Tut budzie arhanizavana hłybokaja pierapracoŭka zbožža pa sučasnych mietadach bijatechnałohii z atrymańniem niezamiennych aminakisłot (lizin, tryptafan, treaninu) dla vytvorčaści vysokapradukcyjnych, vysokatechnałahičnych, zbałansavanych karmoŭ i karmavych dabavak. Pradukcyju miarkujecca jak vykarystoŭvać dla ŭłasnaj vytvorčaści, tak i pastaŭlać na rynki Rasii, Ukrainy, krain ES, Kitaja.
