Błohier Ściapan Puciła sychodzić z telekanała «Biełsat».
«Pryjdzie čas — raskažu pra pryčyny», — skazaŭ błohier u razmovie z karespandentam «NN». Paśla sychodu z telebačańnia Ściapan płanuje skancentravacca na pracy nad svaim telehram- i jutub-kanałami.
Ściapan Puciła. Fota belsat.eu.
Kiraŭnik adździeła infarmacyi «Biełsata» Źmicier Jahoraŭ tak prakamientavaŭ u svaim fejsbuku: «Apošni vypusk «Subjektyva» (satyryčnaja pieradača, u stvareńni jakoj udzielničaŭ Ściapan Puciła — «NN») vyjdzie 26 červienia. Pra heta było abvieščana ŭ karparatyŭnym kamunikatary z tydzień tamu. Ściapan budzie bolš času addavać svaim ułasnym prajektam, a raniejšaja supraca ź Biełsatam u vyhladzie prajektu «Subjektyŭ», na žal, budzie zavieršanaja.
Kožny prajekt maje svoj pačatak i maje svajo zaviaršeńnie, heta narmalna. Zrešty, nie vyklučana, što supraca sa Ściopam budzie praciahnutaja ŭ niejkim inšym farmacie», — napisaŭ Jahoraŭ.
Ściapan Puciła — adzin z najbolš papularnych biełaruskich błohieraŭ. Na dva jahonyja kanały ŭ telehramie padpisana 283 tysiačy i 213 tysiač karystalnikaŭ adpaviedna. Na jutubie jon maje 405 tysiač padpisčykaŭ — heta značna bolej, čym, naprykład, u Siarhieja Cichanoŭskaha.
Puciła źjaŭlajecca adnym z najbolš rezkich krytykaŭ palityki Alaksandra Łukašenki. Błohier žyvie ŭ Polščy.
