Dyrektar Nacyjanalnaha instytuta adukacyi Ministerstva adukacyi Valancina Hinčuk rekamienduje dla navučańnia školnikaŭ na adlehłaści vykarystoŭvać maksimum resursaŭ, što isnujuć siońnia. Jak arhanizavać navučańnie, Valancina Hinčuk raskazała siońnia ŭ časie anłajn-kanfierencyi na sajcie BIEŁTA.
U pieršuju čarhu dla navučańnia treba vykarystoŭvać školnyja padručniki, jakija vydadzieny pa ŭsich pradmietach dla ŭsich kłasaŭ. U ich adlustravany ŭvieś materyjał u adpaviednaści z vučebnymi prahramami. Elektronnyja viersii vučebnych dapamožnikaŭ raźmieščany na nacyjanalnym adukacyjnym partale ŭ biaspłatnym dostupie.
Akramia padručnikaŭ jość atłasy, konturnyja karty, rabočyja sšytki na drukavanaj asnovie, inšyja dapamožniki. Ich taksama treba zadziejničać pry arhanizacyi samastojnaj raboty. Vydaviectvy, jakija vypuskajuć rabočyja sšytki na drukavanaj asnovie, pradastavili biaspłatny dostup da rabočych sšytkaŭ u toj častcy, jakaja datyčycca čaćviortaj čverci.
Jość i elektronnyja navučalnyja resursy. Jany raźmieščany na nacyjanalnym adukacyjnym partale na płatformie Moodle. Pavodle danych na 1 krasavika, dla ich vykarystańnia zarehistravany amal 54 tys. karystalnikaŭ. Ź ich 14 tys. — piedahohi, astatnija — navučency.
«Na nacyjanalnym adukacyjnym partale jość i inšyja vučebnyja vydańni, raspracavanyja raniej pa prahramie kompleksnaj infarmatyzacyi, jość hukavyja dadatki da vučebnych dapamožnikaŭ pa zamiežnych movach», — rastłumačyła Valancina Hinčuk.
Nastaŭniki majuć prava i mahčymaść raspracavać svaje dadatkovyja materyjały, vykarystoŭvajučy infarmacyjna-kamunikacyjnyja technałohii. «Dla dapamohi nastaŭniku padrychtavany pieraliki internet-servisaŭ, jakija možna vykarystoŭvać dla raspracoŭki interaktyŭnaha kantentu, arhanizacyi ŭzajemadziejańnia z navučencam, videatranślacyi vučebnych materyjałaŭ, arhanizacyi zvarotnaj suviazi z navučencam», — raskazała dyrektar Nacyjanalnaha instytuta adukacyi.
Hetyja rekamiendacyi razam ź pieralikami servisaŭ raźmieščany na nacyjanalnym adukacyjnym partale. Mietadyčnyja padkazki, jak pracavać z hetymi servisami, i rekamiendacyi možna znajści na partale ŭ raździele «Dystancyjny ŭsienavuč» dla piedahohaŭ. Tam ža budzie adkryta rubryka «Z vopytu raboty piedahohaŭ». «My viedajem, što ŭ rehijonach pravodzicca vialikaja rabota pa raspracoŭcy elektronnych adukacyjnych resursaŭ. U nastaŭnikaŭ jość šmat napracovak, svaje sajty i błohi. U raździele «Z vopytu raboty piedahohaŭ» my raźmieścim spasyłki na hetyja sajty i błohi, kab inšyja nastaŭniki mahli skarystacca hetymi napracoŭkami i pravilna arhanizavać vučebny praces», — adznačyła Valancina Hinčuk.
