25-hadovy paciarpieły paznajomiŭsia sa svaimi kryŭdzicielami nočču na čyhunačnym vakzale ŭ Mahilovie. Chłopiec źbiraŭsia jechać u Minsk na rabotu, a kampanija — na daču ŭ Kličaŭski rajon. Pierad adpraŭleńniem, akramia biletaŭ na ciahnik, było vyrašana kupić śpirtnoje. U honar znajomstva vydatki ŭziaŭ na siabie paciarpieły, piša Źviazda.
U darozie pasažyry vyjšli ŭ tambur pakuryć. Z-za mocnaha apjanieńnia mahiloviec nie zaŭvažyŭ, jak adzin z chłopcaŭ vyciahnuŭ u jaho z zadniaj kišeni štanoŭ 25 rubloŭ. Zatym usie viarnulisia ŭ kupe, i paciarpieły zadramaŭ. Hetym skarystałasia inšaja ŭdzielnica zastolla — dziaŭčyna dastała z unutranaj kišeni kurtki kašalok, zabrała adtul bolš za 200 rubloŭ i viarnuła partmane.
Troica pakinuła ciahnik na stancyi Niasieta, a ačuniały paźniej małady čałaviek, nie znajšoŭšy hrošaj, patelefanavaŭ u milicyju.
Pravaachoŭniki vyvučyli zapisy z kamier videanazirańnia i apytali zajaŭnika, što dazvoliła ŭstanavić asoby padazravanych. Daviedalisia, dzie jany znachodziacca, i vyjechali na miesca. Da taho času častka vykradzienaha była patračana na kuplu śpirtnoha i praduktaŭ charčavańnia ŭ viaskovaj kramie. Užo pry ahladzie dačnaha doma ŭdałosia znajści hrošy, što zastalisia. Jany byli schavanyja ŭ padušcy.
Dziejańniam padazravanych śledčyja dali pravavuju acenku i zaviali kryminalnyja spravy pa fakcie kradziažu. Viadoma, što chłopiec i dziaŭčyna raniej nieadnarazova pryciahvalisia da kryminalnaj adkaznaści za anałahičnyja złačynstvy, a taksama razboj, naŭmysnaje pryčynieńnie ciažkaha cialesnaha paškodžańnia i zahadzia iłžyvy danos.
