U Kitai epidemija karanavirusa pajšła na spad, ale ŭźnikli try novyja vialikija asiarodki zarazy.
Heta Paŭdniovaja Kareja, a taksama bližejšyja da nas Italija i Iran.
U Italii za dva dni kolkaść vyjaŭlenych chvorych padskočyła da troch socień. Pieršaja plama vyjaŭlenaja na miažy Łambardyi i Vienieta na poŭnačy. Italija błakavała darohi da pasieliščaŭ, dzie zafiksavana asabliva šmat vypadkaŭ virusnaj pnieŭmanii, ale vypadki zafiksavanyja ŭžo ŭ roznych pravincyjach. Ludzi, jakija pryjechali ź Italii, pryvieźli niemač na Kanary, u Charvatyju, Aŭstryju i Šviejcaryju.
Situacyja ŭ Iranie vyhladaje samaj niebiaśpiečnaj. Tudy zarazu zavioz čaŭnok, jaki pa spravach naviedvaŭ Uchań. Ahmianiom epidemii tut staŭ śviaty dla šyitaŭ horad Kum, ale chvaroba vyplesnułasia za jaho miežy.
Aficyjna ŭłady Tehierana paviedamlajuć pra 15 pamierłych, sotniu paćvierdžanych vypadkaŭ i 300 špitalizavanych, ale deputat parłamienta ad Kuma zajaviŭ, što pamierłych u jaho na radzimie ŭžo 50.
Iran — dziaržava zakrytaja. Pakazalny fakt, adnak, heta chvaroba namieśnika ministra achovy zdaroŭja, jaki kaardynavaŭ baraćbu ź infiekcyjaj. Učora na pres-kanfierencyi jon kašlaŭ i, zdavałasia, zadychaŭsia. A siońnia jon paviedamiŭ, što ŭ jaho vyjaŭleny karanavirus.
Jon adčuvaje siabie narmalna, pa jaho słovach, i zaraz znachodzicca ŭ infiekcyjnaj balnicy.
Pamier prablemy ŭ Iranie pakazvaje toj fakt, što ŭžo ŭ šaści krainach vyjaŭlenyja ludzi, jakija zarazilisia virusam na piersidskaj ziamli. Heta dziaržavy ad Kanady da Arabskich Emirataŭ. Takaja masavaść nie moža nie być vynikam taho, što epidemija ŭ Iranie zajšła daloka. Zdajecca, ułady hetaj teakratyčnaj dziaržavy zamoŭčvali prablemu pierad vybarami, jakija tam prajšli na minułym tydni.
Bolšaść krain-susiedak Irana spynili transpartnaje złučeńnie z hetaj krainaj.
