Siońnia Jeŭrapiejski sajuz na hod padoŭžyŭ sankcyi suprać Biełarusi, u MZS Biełarusi rasčaravanyja takim rašeńniem.
U źniešniepalityčnym viedamstvie ličać sankcyi «biespadstaŭnymi pieražytkami minułaha i prajavaj palityčnaj iniercyi ŭ padychodach Jeŭrasajuza da vybudoŭvańnia dyjałohu ź Biełaruśsiu».
«Bo vidavočna, što za apošnija hady ŭ biełaruska-jeŭrapiejskich adnosinach dasiahnuta značna bolš, čym za papiaredniaje dziesiacihodździe sankcyj», — ahučyli ŭ MZS svaju pazicyju.
U svajoj aficyjnaj zajavie ministerstva zaklikała Jeŭrasajuz da admovy ad sankcyjnych kliše, jakija tolki pieraškadžajuć narmalnamu dyjałohu i supracoŭnictvu jak pa dvuchbakovych pytańniach, tak i pa pieraadoleńni ahulnych vyklikaŭ u rehijonie, i vykazała nadzieju, što ŭžo ŭ najbližejšaj budučyni biełaruska-jeŭrapiejskija adnosiny nabuduć sapraŭdy niedyskryminacyjny charaktar.