Anarchisty Ivan Komar i Mikita Jemialjanaŭ u sudzie. Fota Nadziei Bužan
U Savieckim rajonnym sudzie prajšli sudovyja sprečki pa spravie ab napadzie na budynki Mienharsudu i SIZA na Vaładarskaha. Epizody spravy adbyvalisia 25 vieraśnia, 13 i 20 kastryčnika minułaha hodu. Na łavie padsudnych — aktyvisty anarchisckaha ruchu Mikita Jemialjanaŭ i Ivan Komar, jakich vinavaciać u šerahu złačynstvaŭ, źviazanych z napadami. 11 lutaha ŭ pieršaj pałovie dnia dziaržaŭny abvinavaŭca Maksim Sieniŭ zajaviŭ, što vina abodvuch padsudnych dakazanaja, i zapatrabavaŭ im ad sudu pa 7 hadoŭ źniavoleńnia, piša «Radyjo Svaboda».
«Meta pieraśledu moža być dasiahnutaja bieź źniavoleńnia»
Advakat Dźmitryj Lepretar ličyć paškodžańnie budynku Mienharsudu, va ŭdziele ŭ jakim abvinavačvajuć jahonaha padabaronnaha Mikitu Jemialjanava, a taksama Ivana Komara, niaznačnym złačynstvam. Pavodle abaroncy, škoda ŭ 142 rubli, naniesienaja budynku sudu Jemialjanavym, užo kampensavanaja, tamu hetaje złačynstva varta kvalifikavać jak małaznačnaje. Vinu Jemialjanava i Komara va ŭdziele ŭ paškodžańni budynku SIZA adkat ličyć niedakazanaj, bo, na dumku abaroncy, nie byli daśledavanyja reštki prystasavańnia, jakoje vykarystaŭ Jemialjanaŭ dla napadu. Taksama advakat miarkuje, što Jemialjanaŭ i Komar nia viedali pra toje, što administracyjny korpus SIZA № 1 — historyka-kulturnaja kaštoŭnaść. Da taho ž hetaja kaštoŭnaść, na dumku abaroncy, nie była paškodžanaja istotna: straty składajuć usiaho 1 rubiel 48 kapiejek.
«10 hadoŭ ja naviedvaju izalatar jak advakat. Što Piščałaŭski zamak — pomnik historyi, mnie heta było viadoma, ale što prybudova da izalatara i administracyjny korpus taksama pomniki, pra heta daviedacca było niemahčyma, pačuŭ heta ŭpieršyniu», — skazaŭ sudu advakat Dźmitryj Lepretar.
«U vyniku z usiaho abvinavačańnia tolki pa častcy 1 artykuła 295-3 (vyrab niebiaśpiečnaha prystasavańnia) prašu sud pryznačyć majmu padabaronnamu minimalnaje pakarańnie, ale ŭličyć, što Jemialjanaŭ pryciahvajecca da kryminalnaj adkaznaści ŭpieršyniu. Liču, što meta kryminalnaha pieraśledu Jemialjanava moža być dasiahnuta biez realnaha źniavoleńnia», — skončyŭ vystup u sprečkach advakat Dźmitryj Lepretar.
«Prašu pa ŭsich abvinavačańniach apraŭdać»
Advakat Ludmiła Kazak ličyć, što nivodnaje abvinavačańnie Ivana Komara ŭ sudzie nie było dakazanaje.
Advakat zajaviła sudu, što Ivan Komar nia kidaŭ lampački z farbaj u budynak Mienharsudu i nia viedaŭ, što budzie rabić Jemialjanaŭ pry napadzie na budynak «Vaładarki», a inšaje nie dakazana.
Sam Ivan Komar nie vyrablaŭ «kaktejl Mołatava» i nie pieravoziŭ jaho pa horadzie, miarkuje abaronca. Toje, što Ivan Komar na prośbu Mikity Jemialjanava nabyŭ lampački, čyrvonuju farbu i raspuščalnik dy pieradaŭ hetyja pakupki Jemialjanavu, nielha ličyć padrychtoŭkaj da złačynstva, bo jon ničoha nia viedaŭ pra plany Jemialjanava, zaznačyła advakat Kazak.
Nia ličyć abaronca dakazanym udziełam u napadzie na SIZA toje, što Komar na prośbu Mikity Jemialjanava źniaŭ na videa padziei na vulicy Vaładarskaha kala izalatara. Toje, što budynak SIZA — historyka-kulturnajia kaštoŭnaść, Ivanu Komaru nie było viadoma, i tamu namieru jaho paškodzić u jaho nie było, ličyć advakat Ludmiła Kazak.
Advakat nahadała sudu pra zajavu jaje padabaronnaha Komara ab psychalahičnym cisku na jaho adrazu paśla zatrymańnia, šantaž z boku śledčych, a taksama źbićcio i pahrozy hvałtu ŭ kamery izalatara. Komar kazaŭ pra sukamernika z tatuiroŭkami, jaki patrabavaŭ ad jaho «patrebnych pakazańniaŭ». «Hetyja zajavy majho padabaronnaha ŭ sudzie nichto nie abvierh», — zaznačyła advakat Ludmiła Kazak.
Što napadu na budynak Mienharsudu, to abvinavačańnie ŭ im, pavodle abaroncy Ludmiły Kazak, treba źniać ź Ivana Komara z pryčyny «małaznačnaści złačynstva».
Prakuror Maksim Sieniŭ admoviŭsia ad replik u adkaz na arhumenty advakataŭ.
Apošnija słovy padsudnych
Ivan Komar u apošnim słovie zajaviŭ, što dobra viedaje sudovuju systemu ŭ krainie i nie raźličvaje na apraŭdalny prysud.
«Matyŭ vystaŭlenaha abvinavačańnia ŭsim vidavočny, ale ŭsio ž prašu sud nie pazbaŭlać mianie voli», — skazaŭ Ivan Komar.
Apošniaje słova Mikity Jemialjanava taksama było vielmi karotkaje.
«U baraćbie za svabodu, spraviadlivaść i pravy čałavieka meta apraŭdvaje srodki», — skazaŭ małady anarchist, jakoha vinavaciać u kidańni «kaktejla Mołatava» ŭ «Vaładarku» i napadzie na Mienharsud. Padsudny zajaviŭ pra niazhodu z patrabavańniem prakurora pazbavić jaho voli, ale niepasredna ŭ sudu ničoha nie prasiŭ.
Prysud anarchistam Jemialjanavu i Komaru abvieściać 12 lutaha.
